“Deloitte” analizon sektorin bankar – “Kriza e ka gjetur në kushte të mira financiare, gati për të përballuar goditje”
“Deloitte” ka publikuar një raport të zgjeruar për sektorin bankar në vendet e europës qendrore dhe juglindore, ku në analizë merret edhe kuadri makroekonomik. Mes vendeve të analizuara renditet edhe Shqipëria. Sa i përket recesionit ekonomik gjatë vitit të kaluar, ai vlerësohet në -6%. Krahasuar me vendet e tjera të rajonit, kjo është norma e 7-të më e lartë. Në total janë analizuar 16 shtete të rajonit të gjerë. Sa i përket papunësisë ndërkohë, në 2020-ën, vitin e pandemisë, Shqipëria regjistron normën e 8-të më të lartë në rajon.
Sa i përket indikatorëve të sektorit bankar, norma e aseteve bankare në raport me Prodhimin e Brendshëm Bruto në vendin tonë vlerësohet në rreth 89%, çka na vendos diku në mes të renditjes rajonale. Sa i përket numrit të bankave në qarkullim, 12 në Shqipëri, si dhe marrëveshjeve të blerjes dhe shkrirjes (M&A), vendi ynë renditet ndër të fundit në rajon, rrjedhojë e një tregu më të vogël.
Referuar impaktit të Covid-19 në sektorin bankar në vendin tonë, “Deloitte” nënvizon se, pandemia e ka gjetur këtë sektor në kushte të mira financiare. “Pozita financiare pritet ta mbështesë sektorin bankar në përthithjen e goditjeve të mundshme që mund të rrjedhin nga impakti i pandemisë në ekonomi”-thuhet në raport. “Përgjatë gjysmës së parë të vitit 2020, sektori bankar në Shqipëri u zgjerua me 4% në terma asetesh dhe me 7% krahasuar me të njëjtën periudhë të vitit paraardhës. Sektori bankar e mbylli gjysmën e parë të vitit me fitim, paçka se 32% më të ulëta se e njëjta periudhë e vitit të mëparshëm.”-vijon raporti.
Roel Korkuti / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.