Delta dhe Omicron, “kërcënim i dyfishtë” – OBSH: Së bashku, po shkaktojnë një “tsunami” të rasteve!

Qarkullimi në të njëjtën kohë i varianteve Delta dhe Omicron të koronavirusit, po krijojnë një “tsunami” të rasteve, sipas drejtorit të Përgjithshëm të Organizatës Botërore të Shëndetësisë, Tedros Adhanom Ghebreyesus. Ai tha se Delta dhe Omicron janë kthyer në kërcënime të dyfishta, duke nxitur rastet në nivele rekord dhe shtuar shtrimet në spitale dhe vdekjet.

Tedros përsëriti thirrjen për vendet që të ndajnë vaksinat në mënyrë më të barabartë dhe paralajmëroi se përqendrimi tek dozat nxitëse tek vendet e pasura, mund të lënë shtete e varfra në mungesë të injeksioneve. Ai tha se OBSH po bën fushatë për çdo vend që të arrijë një objektiv prej 70% të mbulimit me vaksinë deri në mes të vitit 2022, ç’ka do të ndihmojë në përfundimin e fazës akute të pandemisë.

Faza e akute mund të përfundojë në vitin e ardhshëm, por koronavirusi nuk do të zhduket, sipas kreut të emergjencave tek OBSH, Mike Ryan. Mbrëmja e Vitit të Ri do të shënojë përvjetorin e dytë kur Kina alarmoi OBSH për 27 raste të një pneumonie virale, me origjinë të panjohur, në qytetin e Wuhanit.  Mbi 281 milionë njerëz janë infektuar që prej atëherë nga koronavirusi dhe mbi 5 milionë kanë vdekur.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.