Dëmet e prapambetura – Do të paguhen brenda vitit 2018
Dëmet e prapambetura nga Fondi i Kompensimit në Byronë Shqiptare të Sigurimeve priten të shlyhen brenda vitit të ardhshëm. Drejtori i përgjithshëm ekzekutiv i Autoritetit të Mbikëqyrjes Financiare tha të martën se janë afërsisht 10 milionë euro dëme, që datojnë që prej vitit 2002, të cilat do të shlyhen brenda vitit 2018.
Fondi i Kompensimit ka detyrim ligjor të paguajë dëmet e shkaktuara nga mjetet e pasiguruara. Por, për shkak të neglizhencës dhe mosfunksionimit në vite të Byrosë Shqiptare të Sigurimeve, një sasi e madhe e detyrimesh, sidomos të para vitit 2013, nuk janë shlyer.
Procesi në fakt ka nisur gradualisht që këtë vit dhe besohet se mund të ketë pasur një ndikim në rritjen e dëmeve të paguara nga kompanitë këtë vit. Sipas të dhënave nga Autoriteti i Mbikëqyrjes Financiare, për tetëmujorin 2017 dëmet e paguara nga kompanitë janë rritur me 31% ndaj të njëjtës periudhë të një viti më parë.
Raporti mes dëmeve dhe primeve këtë vit është rreth 33%, më i lartë se nivelet tipike të tregut shqiptar të sigurimeve. Dëmet dominohen nga sigurimet e detyrueshme motorike, me më shumë se gjysmën e vlerës totale të paguar nga siguruesit në tetë muajt e parë të vitit. Por, një rritje e lartë e dëmeve të paguara është regjistruar edhe në disa prej klasave të sigurimit vullnetar, si sigurimi ndaj dëmtimeve në pronë dhe sigurimi i shëndetit.
Për sa i takon primeve, tregu i sigurimeve ngelet në rritje, me rreth 12% krahasuar me tetëmujorin e parë të vitit 2016. Struktura e primeve po dominohet gjithnjë e më shumë nga sigurimet e detyrueshme motorike, që për këtë vit zënë mbi 67% të totalit.
Ndërkohë, tregu i sigurimit të jetës regjistroi një rritje ndjeshëm më të lartë se mesatarja e tregut, me 27% më shumë krahasuar me të njëjtën periudhë të një viti më parë.
Ersuin Shehu/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.