Dëmet e prapambetura po “pastrohen” – Siguruesit paguan 7 miliardë lekë vitin e kaluar

Kompanitë e sigurimeve paguan mbi një miliard lekë dëme të prapambetura vitin e kaluar. Sipas të dhënave nga Autoriteti i Mbikëqyrjes Financiare, dëmet e bartura në vite në Fondin e Kompensimit të Byrosë së Sigurimeve janë shlyer në pjesën më të madhe të tyre.

Shlyerja e detyrimeve të prapambetura ndaj Byrosë së Sigurimeve ka sjellë një rritje të ndjeshme të dëmeve totale të paguara. Gjatë vitit 2018, siguruesit paguan afro 7 miliardë lekë dëme, në rritje me 26% krahasuar me vitin 2017. Raporti mes dëmeve dhe primeve ka arritur në 41%, një ndër më të lartët e regjistruar ndonjëherë në tregun shqiptar të sigurimeve.

Presioni i AMF-së dhe Komisionit Kuvendor të Ekonomisë më në fund duket se ka sjellë rezultate në shlyerjen e detyrimeve të prapambetura të Fondit të Kompensimit. Në dy vjet, kompanitë kanë paguar rreth 1.7 miliardë lekë dëme.

                                                 Burimi: AMF

Tregu i sigurimeve shfaqi një rritje modeste edhe vitin e kaluar. Primet e shkruara bruto u rritën me 4.5% krahasuar me një vit më parë. Në veçanti, tregu i sigurimit të jetës rezultoi në rënie me 4.5%. Shqiptarët paguajnë mesatarisht rreth 45 euro prime sigurimi për frymë, vlerë kjo më e ulët krahasuar qoftë edhe me vendet fqinje.

Pesha e sigurimeve të detyrueshme u thellua edhe më shumë këtë vit, duke e bërë tregun gjithnjë e më të varur prej tyre. Sigurimet e detyrueshme motorike sollën mbi 68% të primeve të arkëtuara nga kompanitë vitin e kaluar. Edhe në tregun e sigurimit të jetës më shumë se gjysma e primeve erdhën nga sigurimi i jetës së debitorit, sigurim ky që kërkohet në mënyrë të detyrueshme nga institucionet financiare.

                                         Burimi: AMF

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.