Dëmet nga aksidentet, Sigurimet kanë paguar 2.1 miliardë lekë në 2016

Dëmet e paguara për sigurimet motorike gjatë vitit të kaluar arritën në 2.1 miliardë lekë. Sipas të dhënave nga Autoriteti i Mbikëqyrjes Financiare, dëmet e paguara për aksidentet u rritën vitin e kaluar me 23%. Kjo shifër përfshin pagesat e dëmeve të kryera nga kompanitë shqiptare të sigurimeve në dy klasa, atë të përgjegjësive të brendshme motorike ndaj palëve të treta dhe në sigurimin kasko të mjeteve tokësore.

Në total, këto dy klasa përbëjnë më shumë se gjysmën e dëmeve që paguhen në tregun shqiptar të sigurimeve. Me gjithë rritjen e vitit të kaluar, duket se shifrat që paguhen për zhdëmtimin e aksidenteve në Shqipëri janë mjaft të ulëta.

Nëse marrim për të mirëqenë statistikën e Bankës Botërore, për një vlerë aksidentesh që shkon në rreth 130 milionë euro në vit, atëherë për vitin e kaluar sigurimet paguan në dëme më pak se 12% të kësaj shume.

Diferenca, në pjesën dërrmuese, paguhet nga vetë të dëmtuarit ose nga shteti në formën e shpenzimeve mjekësore apo sociale. Kjo nuk është e vetmja llogaritje që evidenton vlera të ulëta të pagesës së dëmeve në tregun shqiptar të sigurimeve.

Raporti mes dëmeve dhe primeve në sigurimin e detyrueshëm motorik për vitin e kaluar ishte vetëm 23%, shifër kjo tejet e ulët krahasuar me gjithë vendet e tjera të Evropës, sidomos po të kemi parasysh se ky është produkti që zë peshën kryesore në tregun e  sigurimeve.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.