Dëmi 169 milionë euro – KLSH nxjerr abuzimet nga institucionet në 2014-2016
Kontrolli i Lartë i Shtetit vlerëson se dëmi që i është shkaktuar buxhetit të shtetit si në kahun e të ardhurave të munguara ashtu edhe të shpenzimeve të kryera është 169 milionë euro.
Në raportin e fundit që përfshin kontrollet e ushtruara në muajt janar-prill 2017 është pikërisht kjo shuma e zbuluar në institucionet shtetërore. Aktiviteti ekonomik i periudhës së audituar i përket viteve 2014-2016.
Por si ndahet në fakt dëmi i konstatuar. Të paktën 7.1 milionë euro janë dëm ekonomik i hasur në parregullsi dhe shkelje financiare tek shpenzime të kryera.
Kurse pjesa prej 162 milionë euro lidhet me performancën negative të institucioneve në mbledhjen e të ardhurave. Rekordin e mbajnë prokurimet me dëmin 282 milionë lekë dhe më pas tatimtaksat me 233 milionë lekë, të ndjekura nga doganat me 150 milionë lekë dëm.
Në fushën e shitjes dhe dhënies me qira të pasurisë shtetërore sërish shifra e dëmit mbetet e lartë në nivelin 149 milionë lekë.
Më pas vijnë me radhë shpërblimet dhe pagat me 53 milionë lekë, shpenzimet operative me 43 milionë lekë dhe të tjera me 37 milionë lekë. Urbanistika mbetet në fund me 8 milionë lekë dëm.
Dëmi sipas fushave
Prokurimet 282 milionë lekë
Tatimtaksat 233 milionë lekë
Doganat 150 milionë lekë
Shitja dhe qiradhënia 149 milionë lekë
Shpërblimet 53 milionë lekë
Shpenzimet operative 47 milionë lekë
Të tjera 37 milionë lekë
Urbanistika 8 milionë lekë.
Nertila Maho/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.