Denaj vizitë zyrtare në Turqi, nënshkruhet Protokolli i Bashkëpunimit

Ministrja Denaj ndodhet për një vizitë dy ditore në Turqi, ku është pritur nga nga z. Mehmet Muharrem Kasapoğlu, Kryetar i Komisionit të Përbashkët Ndër-Qeveritar për Bashkëpunim Ekonomik, Turqi- Shqipëri.

Shqipëria dhe Turqia kanë një marrëdhenie shumë intensive tregtare, në sektorë strategjikë të ekonomisë. Në Shqipëri momentalisht operojnë rreth 592 kompani turke në fusha strategjikë të ekonomisë si energji, banka, telekomunikacion, infrastrukturë, arsim etj.

Gjatë këtij viti, importet nga Turqia arritën vlerën prej 424 mln euro, me një rritje prej 34% në peshë dhe 17.7% në vlerë krahasuar me një vit më parë. Eksportet shqiptare arritën në 14.8 mln euro ku janë eksportuar kryesisht alumin, produkte bujqësore, hekur dhe materiale minerale.

Ministrja Denaj dhe z. Kasapoğlu nënshkruan Protokollin e Bashkëpunimit të Sesionit të 12-të të Komisionit të Përbashkët Ndër-Qeveritar për Bashkëpunim Ekonomik, Tregtar, Industrial dhe Teknik Turqi- Shqipëri.

Gjithashtu është nënshkruar edhe një vendim i ri, i cili përcakton njehsimin e rregullave të origjinës preferenciale të mallrave, sipas Rregullave Preferenciale të Origjinës parashikuar nga Konventa Rajonale Pan-Euro-Med, duke shfuqizuar në këtë mënyrë vendimin aktual që ekzistonte prej vitit 2011.

Ministrja Denaj zhvilloi një takim edhe me presidentin e Unionit të Dhomave të Tregtisë dhe Industrisë, z.Rifat Hisarciklioglu, me të cilin u dakordësuan për organizimin brenda dy muajve të ardhshëm të një takimi të ngushtë biznesesh nga të dyja vendet në Tiranë, në zbatim të marrëveshjes të nënshkruar mes dy unioneve, si dhe dhënien e asistencës teknike për të ndihmuar në rritjen e rolit të Bashkimit të Dhomave të Tregtisë së Shqipërisë dhe fuqizimin e kapacitetit të saj.

Palët vendosën të mbajnë bashkëpunimin në vijim, duke vendosur në axhendat respektive një takim në Tiranë vitin e ardhshëm.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.