Depozitat nga jashtë – Arrijnë në 1.2 miliardë euro në fund të tremujorit të parë 2017

Depozitat e jorezidentëve në sistemin bankar shqiptar kanë arritur vlerën rekord të afro 1.2 miliardë eurove.

Sipas të dhënave nga Banka e Shqipërisë, në fund të tremujorit të parë të vitit, detyrimet e jashtme në formë depozitash të bankave shqiptare janë rritur me rreth 113 milionë euro krahasuar me një vit më parë.

Megjithëse në vitet e fundit vëmendja është përqendruar tek zgjerimi i kredisë për jorezidentët, shifrat tregojnë se depozitat në këtë segment kanë vlera më të mëdha.

Nëse kredia për jorezidentët ka vlerën e rreth 500 milionë eurove, depozitat janë gati një herë e gjysmë më shumë.

Nga afërsisht 1.2 miliardë euro depozita të jorezidentëve, rreth një e katërta e kësaj shuma përbëhet nga depozitat e degës së Bankës Kombëtare Tregtare në Kosovë. Pjesa tjetër është e vështirë të detajohet, megjithatë vlerësohet se një pjesë e madhe konsiston në vendosjet e bankave të huaja, kryesisht të atyre që i takojnë të njëjtit grup financiar me bankat që zhvillojnë aktivitet në Shqipëri.

Megjithatë, veçanërisht në vitet e fundit, besohet se ka një rritje të ndjeshme edhe të depozitave të emigrantëve në sistemin bankar shqiptar. Pas krizës që preku sistemet financiare në disa vende të zonës euro, sidomos Greqinë, shumë emigrantë preferuan t’i zhvendosin kursimet e tyre më sistemin bankar shqiptar.

Rritja e depozitave nga jorezidentët është një tregues besimi te sistemi bankar shqiptar, që është provuar i sigurt dhe i qëndrueshëm.

Ersuin Shehu/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.