Depozitimi i gazit në BE – Ligjvënësit kërkojnë një marrëveshje të shpejtë mbi rregullat emergjente!

Ligjvënësit e Parlamentit Europian, të cilët po negociojnë rregullat emergjente për të depozitimin e gazit, po bëjnë presion për arritjen e një marrëveshje në dy muajt e ardhshëm për të ndërtuar një tampon furnizimi në kohë për dimër, kur kërkesa e gazit për ngrohje arrin kulmin.

Ndërsa blloku kërkon të zvogëlojë varësinë nga Moska, e cila mbulon rreth 40% të gazit të BE-së dhe përgatitet për ndërprerje të mundshme të furnizimit, rregullat e propozuara do të detyrojnë secilin vend anëtar të mbushë depozitat e gazit në të paktën 90% të kapacitetit deri më 1 nëntor, duke nisur nga viti 2023 dhe 80% këtë vit.

Ligjvënësi i BE-së Jerzy Buzek, ish-kryeministri polak dhe ligjvënësi kryesor i Parlamentit për rregullat, tha se ekipi i Parlamentit shpresonte të fillonte bisedimet me vendet anëtare brenda dy javësh dhe të arrinte një marrëveshje që ligjvënësit mund ta votonin në qershor. Parlamenti dhe vendet e BE-së duhet të miratojnë ligjin.

Mund të duhen rreth dy vjet për të negociuar dhe miratuar një ligj të BE-së, por rregullat për gazin po përshpejtohen. Çështjet e pazgjidhura përfshijnë atë që BE-ja do të bënte nëse vendet nuk arrijnë të mbushin depozitat e tyre dhe nëse objektivi i mbushjes së këtij viti duhet të jetë gjithashtu 90%. Magazinimi i gazit i BE-së aktualisht arrin në 29%.

“Ne duhet të përcaktojmë saktësisht grupin e masave efektive të marra nga Komisioni në rast se vendet e BE dështojnë sistematikisht të arrijnë objektivat e mbushjes,” deklaroi Buzek në Komitetin parlamentar të Energjisë.

Rregullat e propozuara nga Komisioni do të kërkonin që vendet të marrin “të gjitha masat e nevojshme” për të mbushur depozitat e tyre, duke përfshirë kompensimin e mundshëm për kompanitë e përfshira në blerjen e gazit.

Komisioni Europian po krijon një sistem për të lejuar vendet anëtare që të blejnë bashkërisht gaz, me shpresën se fuqia e tyre blerëse e kombinuar do t’i lejojë ata të negociojnë çmime më të ulëta.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.