Deputetët europian do të hetojnë personalisht Frontex, mes akuzave për operacione të paligjshme
Parlamenti Europian ka shtuar veprimet e tij për të hedhur dritë mbi akuzat përreth Frontex, agjencia e kontrollit kufitar të BE-së. Frontex po hetohet për ngacmim, sjellje të keqe dhe operacione të paligjshme që synojnë të ndalojnë emigrantët të arrijnë brigjet e BE përmes ujërave greke.
Anëtarët e Parlamentit Europian kanë formuar një grup të ri pune, të quajtur zyrtarisht Grupi Punues i Frontex Scrutiny (FSWG), për të “monitoruar të gjitha aspektet e funksionimit të agjencisë kufitare, përfshirë pajtueshmërinë e saj me të drejtat themelore”.
Ligjvënësit do të kryejnë personalisht një hetim për gjetjen e fakteve gjatë katër muajve të ardhshëm në mënyrë që të mbledhin prova për të përcaktuar nëse shkeljet kanë ndodhur dhe nëse agjencia ishte e përfshirë në to.
Trupi përbëhet nga 14 eurodeputetë, dy nga secila parti politike. Roberta Metsola, një deputete malteze nga Partia Popullore Europiane, është zgjedhur si kryetare. “Ne do të kërkojmë qartësi dhe besim në politikën dhe strategjinë e menaxhimit të kufirit të Europës. Kjo do të thotë se do t’u drejtojmë të gjithëve të gjitha pyetjet që kemi në mënyrë që të marrim përgjigje të qarta,” tha Metsola.
Një nga ndalesat e para të grupit të punës, Metsola thotë, do të jetë një udhëtim në Varshavë, ku ndodhen selitë e agjencisë, për të pyetur drejtpërdrejtë drejtuesit dhe stafin e saj të lartë.
Dragoș Tudorache, një eurodeputet liberal nga Rumania dhe gjithashtu një anëtar i FSWG, thotë se qëllimi i menjëhershëm i hetimit do të jetë shqyrtimi i pretendimeve të Detit Egje. Por, shton ai, misioni do të shqyrtojë gjithashtu funksionimin e përgjithshëm të agjencisë dhe ndryshimet që ka kaluar në vitet e fundit.
Ligjvënësit do të mbështeten në punën e ekspertëve, gazetarëve, shoqërisë civile dhe studiuesve për të hartuar një raport me konkluzione dhe rekomandime. Komisioni Europian dhe autoritetet kombëtare do të merren në pyetje nga eurodeputetët.
Nëse grupi i punës arrin në përfundimin se agjencia ka kryer ose ka qenë bashkëpunëtore në abuzimet e të drejtave të njeriut, ajo mund të sjellë një propozim për zgjidhje në seancën plenare të Parlamentit Europian.
Për më tepër, eurodeputetët mund të përdorin buxhetin e BE-së si levë për ndryshim. Traktatet e BE u japin parlamentarëve fuqinë për të miratuar planet vjetore financiare të bllokut, në një proces të njohur si “shkarkim”. Buxheti përmban financimin e të gjitha agjencive të BE-së, përfshirë atë të Frontex, i cili është rritur ndjeshëm që nga kriza e migracionit në 2015. (EN)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.