Deri në 12 mijë euro për bujtinat – Paketë mbështetje për 150 njësi akomoduese në 100 fshatra

Rreth 150 bujtina në 100 fshatra të përzgjedhur do të mbështeten në 3 vitet e ardhshme me financime, me qëllim rritjen e kapaciteteve të tyre pritëse. Përkatësisht çdo vit janë parashikuar që 50 bujtina të kenë akses në fonde.

Burime nga Ministria e Bujqësisë bëjnë me dije se mbështetja për këtë vit do të mundësohet nga Skemat Kombëtare e Agjencisë së Zhvillimit Bujqësor dhe Rural. Shuma e financimit mbulon deri në 50 për qind të investimit, por jo më shumë se 1.5 milion lekë ose 12 mijë euro.

Kriteret e aplikimit për përthithjen e këtyre fondeve pritet të miratohen me Vendim të Këshillit të Ministrave brenda këtij muaji. Formula është me bashkëfinancim nga fondet e AZHBR-së deri në masën 50 për qind.

Qeveria ka përzgjedhur 100 fshatra në të gjithë vendin, që do të përfitojnë ndërhyrje rrënjësore në infrastrukturë dhe mbështetje financiare për bizneset.

Fshatrat e përzgjedhur ofrojnë potenciale të shumta turistike, kulturore, dhe në listë përfshihen  zona si Lëpusha, Razma, Valbona, Drishti, Mjeda, Fishta, Qelëz, Kryezi, Shishtavec, etj.

Në Tiranë janë përzgjedhur pesë fshatra, konkretisht Shesh, Pezë, Pëllumbas, Laknas, Shëndgjergj. Po ashtu, një numër i konsiderueshëm janë përzgjedhur edhe në jug të vendit, si Mursi, Mesopotam, Çukë, Sotire, Nepravishtë, Lukovë, Dhoskat, Lazarat, etj.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.