Dëshironi të jeni një arbitër në futbollin shqiptar? FSHF, nis konsultat
Prioriteti më i ri i FSHF-së është ngritja e një Akademie Arbitrimi. Kjo nismë është prezantuar në mes të një auditori studentësh në Universitetin “Aleksandër Moisiu” në Durrës.
Një projekt që ka marrë drejtim tashmë, gjithashtu edhe suportin e Presidentit Armand Duka dhe të Komitetit Ekzekutiv, ka të bëjë direkt me afrimin e shumë të rinjve dhe të rejave që duan të jenë pjesë, edhe e arbitrimit të futbollit në të ardhmen.
Tahir Kastrati, anëtari i Komitetit Ekzekutiv të FSHF-së përcolli përpara auditorit edhe këtë nismë, si një angazhim më vete institucional i FSHF-së. Z.Kastrati ftoi të gjithë studentët që të aplikojnë në sitin zyrtar të FSHF-së dhe të provojnë këtë mundësi, tashmë zyrtare dhe konkrete.
Nga ana tjetër Sokol Jareci, përfaqësues i sektorit të gjykimit në FSHF përcolli dhe u shpjegoi me detaje me detaje studentëve edhe mënyrën e aplikimit, fazën e fillimit të projektit si edhe të gjithë kriteret e tjera apo etapat që do të ndiqen.
Pas Tiranës dhe Durrësit, në javët në vijim, grupi i punës do të vijojë me tryezën e prezantimit dhe të bashkëbisedimit për Akademinë e Arbitrimit, me studentë të Universitetit të Elbasanit, më pas në Shkodër, Vlorë dhe Korçë. Të gjithë të interesuarit mund të plotësojnë formularin e aplikimit për të qenë pjesë e Akademisë së Arbitrimit, duke hyrë në faqen zyrtare të FSHF-së.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.