Dështon formimi i qeverisë gjermane – Tërheqja e FPD vë në rrezik mandatin e katërt të Merkel, euro bie

Kancelarja gjermane Angela Merkel tha se përpjekjet e saj për të formuar koalicionin me 2 partitë e tjera ka dështuar, duke e çuar vendin në një krizë politike dhe me shumë mundësi në zgjedhje të reja. Demokratët e lirë u tërhoqën pas 4 javësh negociata me konservatorët e Merkel dhe të Gjelbrit duke cituar dallime të mëdha mes tyre.

Valuta e përbashkët ra në nivelin më të ulët në 2 muaj kundër jenit japonez dhe u tërhoq lehtë edhe kundër dollarit, menjëherë pasi lideri i Demokratëve të Lirë, Christian Lindner, tha se partia e tij po tërhiqet pasi 3 partnerët e mundshëm nuk ndanin ide të përbashkëta në çështje kryesore.

Merkel tha se do të konsultohet me presidentin Frank-Walter Steinmeier për alternativat e mundshme. “Si kancelare, unë do të bëj çdo gjë të jetë e mundur për të siguruar se ky vend është i manaxhuar mirë në javët e vështira që priten të vijnë”, tha Merkel.

Kjo ishte një goditje për Merkel, që në 12 vitet e saj në pushtet është kthyer në simbolin e stabilitetit, ndërkohë që ka drejtuar Eurozonën gjatë krizës së borxhit dhe të emigrantëve.

Zgjedhjet e Shtatorit ishin një sfidë për kancelaren, ndërkohë që votuesit kujtuan vendimin e saj në 2015-ën, ku hapi kufijtë e Gjermanisë ndaj më shumë se 1 milionë emigrantëve, gjë që solli ngritjen e partisë së djathtë ekstreme, AfD.

Ndër pikat që sollën kontradikta mes partive ishin; emigrantët, shpenzimet qeveritare, uljet e taksave dhe politikat mbi klimën. “Nuk kishte progres në bisedime për shkak se kompromiset specifike u vunë nën dyshim. Më mirë të mos qeverisësh se sa ta bësh në mënyrën e gabuar”, tha Christian Lindner i demokratëve të lirë.

Kolapsi i bisedimeve tregon për dy opsione të mundshme; formimin e një qeverie minoritare nga Merkel, apo thirrjen për zgjedhje të reja nga presidenti nëse nuk formohet qeveria.

Klevis Llaha/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.