“Detyra shtëpie” Shqipërisë, FMN: Reformë taksash dhe manaxhim të financave publike
Bordi i Fondit Monetar Ndërkombëtar ka mbyllur edhe rishikimin përfundimtar të programit me Shqipërinë, çka përkthehet në disbursimin e 73.2 milionë eurove nga qeveria shqiptare, duke e çuar huanë me institucionin në 377.3 milionë euro.
Marrëveshja tre vjeçare me Fondin Monetar Ndërkombëtar merr kështu fund zyrtarisht. Institucioni bën edhe bilancin e ekonomisë shqiptare, të paktën sa i përket sektorëve ku ishte fokusuar edhe marrëveshja me qeverinë.
Në terma të përgjithshëm, institucioni flet me superlativa për ekonominë shqiptare, por nënvizon se, pa vazhdimësinë e axhendës së reformave, ky progres do të rezultojë i kotë.
“Prioritetet kyçe të autoriteteve shqiptare në periudhën post-programit janë të përshtatshme. Ata duhet të vazhdojnë me konsolidimin fiskal edhe në 2017-ën dhe më tej, në mënyrë që norma e borxhit publik të zbresë në rreth 60% në fund të vitit 2019”, nënvizon Fondi Monetar Ndërkombëtar.
Institucioni ndër të tjera këshillon qeverinë shqiptare që diçka të tillë ta realizojë nëpërmjet zgjerimit të bazës së taksave dhe përmirësimit të mbledhjes së taksave.
“Kjo strategji është ambicioze dhe kërkon angazhim të palëkundur politik”, vijon Fondi. Pikërisht sa i përket konsolidimit fiskal ka pasur paralajmërime edhe nga institucione të tjera.
Në fillim të muajit Shkurt ishte Standard and Poor`s që deklaronte se objektivat e konsolidimit fiskal janë utopike dhe se qeveria shqiptare nuk do të mund ti realizojë.
Rreth 10 ditë më parë ndërkohë, Komisioni Europian deklaronte se, konsolidimi fiskal është në rrezik, pasi qeveria mund të lëshojë dorën përpara zgjedhjeve të Qershorit.
Fondi Monetar Ndërkombëtar vijon duke folur për progres, pavarësisht se, rekomandon reforma të tjera, sidomos në administratën e taksave dhe menaxhimin e financave publike, pasi vetëm kështu mund të krijoheshin hapësirat e nevojshme për shpenzime të cilësisë së lartë.
Sa i përket politikave monetare, institucioni rekomandon de-eurizim, pra eliminimin e varësisë nga monedha e përbashkët europiane, por në mënyrë graduale.
“Sistemi bankar vijon të mbetet likuid dhe i mirëkapitalizuar. Nevojiten masa të tjera për të adresuar kreditë me probleme si dhe implementimin e një ligji për falimentin. Duhet bërë diçka edhe për të rritur mbikëqyrjen ndaj autoriteteve financiare jo-bankare në mënyrë që të garantohen standardet e tregut”, përfundon Fondi Monetar Ndërkombëtar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.