Detyrimet për eficencën e energjisë – Projektligji, në Kuvend: Masat për reduktimin e konsumit nga sektori publik e privat
Komisioni parlamentar i veprimtarive Prodhuese ka diskutuar ndryshimet në ligjin “Për eficencnën e energjisë”, që parashikojnë një sërë detyrimesh në drejtim të reduktimit të konsumit të energjisë nga sektori publik dhe ai privat që kategorizohet si konsumator i madh energjie. Grupet e interesit u ndalën te ngritja e fondit të energjisë, që sipas tyre me ligjin e ri nuk parashikohet, por sipas zv. ministrit të Infrastrukturës dhe Energjisë, Gjergji Simaku është gjykuar që ai nuk do të jetë i efektshëm, në raport me detyrimet që parashikon ligji i ri.
Ndryshimet ligjore parashikojnë gjithashtu që bashkitë duhet të përgatisin planet vendore të veprimit për efiçencë të energjisë, të cilat përfshijnë politikat dhe masat për përmirësimin e efiçencës së energjisë për të gjithë sektorët që funksionojnë në nivel lokal, mbi bazën e konsumit të energjisë në nivel lokal. Drejtori ekzekutive i Shoqatës së Bashkive, Agron Haxhimali kërkoi që këto detyrime të mos mbeten në letër.
Ndërkohë, grupet e interesit që përfaqësojnë vetëprodhuesit e energjisë kërkuan incentiva për teknologjitë fotovoltaike, si një prej që mund të aplikohen për të reduktuar konsumin e energjisë.
Sipas ligjit të ri, duke filluar nga data 1.9.2021, sektori publik siguron se, minimalisht,2% e sipërfaqes totale të stokut të ndërtesave publike të rinovohet çdo vit, për të përmbushur kërkesat minimale për performancën e energjisë. Ndërkohë që, çdo person juridik që kategorizohet si konsumator i madh energjie, brenda 60 ditëve pas marrjes së rezultateve të auditimit energjetik dhe masave të identifikuara në raportin e auditimit, duhet të hartojë një plan veprimi në përputhje me objektivat individualë për kursimin e energjisë, duke garantuar arritjen e një kursimi të energjisë prej tëpaktën 4% të energjisë ekuivalente totale të konsumuar prej tij.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.