Deutsche Bank rikthehet në lojë – Fitimi neto rritet me 143% prej tregtimit të titujve të borxhit
Huadhënësi më i madh në Gjermani, Deutsche Bank, ka dyfishuar fitimin neto për tremujorin e parë në 575 milionë euro, duke përfituar prej kostove më të ulëta ligjore nga aktivitetet e shkuara dhe një rimëkëmbje në tregtimin e borxhit.
Projeksionet qëndronin në 522 milionë euro.
“Angazhimi me klientët është i fortë, flukset hyrëse po rikthehen në bankë dhe aktiviteti është përmirësuar. Përpjekjet për të ulur kostot kanë filluar të japin efekt”, tha kreu ekzekutiv i bankës, John Cryan.
Banka ka hequr dorë nga aktivitete si tregtimi i produkteve të titullizuara (securitized) dhe ka shkëputur kontakte me qindra klientë në muajt e fundit.
Aksionet e Deutsche Bank janë rritur me 10% nga java e kaluar. Megjithatë, të ardhurat totale ranë me 9% në 7.3 miliardë euro për tremujorin.
Raporti kosto ndaj të ardhurave (cost/income) i bankës ra në 86%, duke mbetur mbrapa huadhënësve të tjerë.
Raporti i kapitalit bazë të bankës ndaj aktiveve të ponderuara me risk (Tier 1 capital ratio), një tregues që mat fuqinë financiare të bankës, u rrit në 14.1% nga 10.7% që ishte një vit më parë, kryesisht prej injektimit të kapitalit në një sasi prej 8.5 miliardë dollarë më herët gjatë muajit.
Rezervat ligjore të bankës ranë në 3.2 miliardë euro në tremujorin e parë. Provigjonet për veprime të mundshme ligjore në të ardhmen qëndruan në 2.4 miliardë euro.
Këtë muaj, Rezerva Federale gjobiti bankën gjermane me 157 milionë dollarë, për thyerjen e rregullave të këmbimit valutor dhe mbi investimet spekulative (Volcker Rule).
Të ardhurat nga tregtimi i titujve të borxhit u rritën me 11% në tremujorin e parë, ndërsa nga tregtimi i titujve të kapitalit (aksionet), ranë me 10%.
Edhe bankat në SHBA kanë raportuar kthime nga tregtimi i titujve të borxhit, nxitur nga investitorët që po përshtasin portofolet e tyre në një kohë të rritjes së normave të interesit.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.