Dhënia e koncesioneve – Nika:Legjislacioni aktual favorizon lejet e pastudiuara, duhen ndryshime

Kuadri ligjor në fushën e koncesioneve paraqet një sërë problemesh, duke favorizuar dhënien e lejeve të pastudiuara, kryesisht në fushën e hidrocentraleve”.

Deklarata vjen nga drejtori ekzekutiv i organizatës ‘EcoAlbania’ pas një analize të ligjeve, akteve nënligjore apo direktivave europiane që rregullojnë gjithë këtë fushë, duke synuar më pas propozimin e ndryshimeve konkrete.

Në kuadër të përmirësimit, studimi i fizibilitetit për një projekt duhet të kryhet nga institucionet shtetërore që hapin garën koncesionare, ndërkohë që marrja e të gjitha lejeve që kërkohen duhet të kryhet para lidhjes së kontratës dhe jo pas saj.

Po ashtu, ndryshime do të kërkohen edhe në drejtim të ofertave të pakërkuara si dhe të procedurave që duhet të ndiqen gjatë negocimit të kontratës, në drejtim të transparencës.

Në total janë marrë në shqyrtim mbi 30 ligje dhe akte nënligjore që rregullojnë fushën e dhënies së koncesioneve, ndërkohë që propozimet finale për ndryshimin e legjislacionit pritet të jenë gati në muajin shtator.

Ola Mitre/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.