Dhjetëra politikanë të Parlamentit Europian pre e përgjimit dhe vjedhjes së të dhënave nga programi spyware Pegasus – BE nis hetimet

Komiteti i Parlamentit Evropian i ngarkuar me hetimin e aktiviteteve të spiunazhit Pegasus ka nisur punën, duke shqyrtuar raste të shumta, duke përfshirë akuzat për spiunim kundër Hungarisë, Polonisë dhe Greqisë.

Në Spanjë, të paktën 65 persona, duke përfshirë tre presidentë katalanas dhe katër eurodeputetë, thuhet se janë spiunuar midis 2017 dhe 2020.

Një hetim i ri i udhëhequr nga Citizen Lab, një grup udhëheqës kërkimor kanadez, thotë se autoritetet spanjolle janë me shumë gjasa pas sulmit të spyware, i cili besohet se kushton qindra milionë euro.

“Ndërsa ne aktualisht nuk ia atribuojmë këtë operacion njësive të veçanta qeveritare, provat rrethanore sugjerojnë një lidhje të fortë me qeverinë e Spanjës, duke përfshirë natyrën e viktimave dhe objektivave, kohën dhe faktin që qeveria e Spanjës raportohet të jetë klient i NSO Group”, thuhet në raportin e Citizen Lab.

Dhjetra politikanë dhe aktivistë katalanas pro-pavarësisë janë shënjestruar nga spyware Pegasus, pretendon hetimi.

Ish-presidenti dhe tani ligjvënësi i Brukselit Carles Puigdemont i cili po bën thirrje për një hetim në nivelin e BE-së, thotë se gruaja, avokati dhe shumë nga stafi i tij ishin gjithashtu objektiva të sulmeve në Pegasus.

“Ne si eurodeputetë, madje edhe një nga asistentët tanë, jemi spiunuar me Pegasus gjatë punës në këtë shtëpi, duke vënë në rrezik komunikimet e të gjithë Parlamentit Europian,” tha Puigdemont.

“Shteti spanjoll ka organizuar një komplot kriminal me para nga burime të errëta dhe jo të kontrolluara në mënyrë demokratike për të sulmuar një lëvizje legjitime politike demokratike dhe shumicë në institucione dhe në rrugë,” shtoi Puigdemont.

Madridi ka mohuar të gjitha akuzat, me Isabel Rodríguez, ministre dhe zëdhënëse e qeverisë spanjolle duke thënë se ata do të bashkëpunojnë plotësisht.

“Qeveria nuk ka asgjë për të fshehur, absolutisht asgjë,” tha Rodríguez. “Prandaj, qeveria do të bashkëpunojë sa më shumë që të jetë e mundur me hetimin e këtyre ngjarjeve nga sistemi i drejtësisë nëse gjykatat do ta kërkojnë këtë.

Softueri, i krijuar nga kompania izraelite NSO dhe i shitur ekskluzivisht për qeveritë, depërton në pajisjet për të lexuar tekste, për të dëgjuar thirrje dhe për të aktivizuar mikrofonat e tyre.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.