Disbalancat në vendet e Eurozonës – Moscovici: Duhet arritur konvergjenca e standardeve të jetesës
Vendet e varfra e të pasura të Eurozonës duhet të ekuilibrojnë standardet e tyre të jetesës në mënyrë që blloku i valutës së përbashkët të vazhdojë të ketë mbështetje politike, deklaron Komisioni Europian.
Qeveritë dhe institucionet e Eurozonës po diskutojnë për mënyra se si të thellojnë integrimin e tyre ekonomik pas kërcënimit që erdhi nga kriza e borxhi sovran të vitit 2010. Programet e shpëtimit drejt 5 vendeve që humbën akses në treg gjatë krizës, kanë sjellë rritjen e rrymave populiste anti-BE, nxitur nga shqetësimi i votuesve nga efektet e globalizimit.
“Divergjencat ekonomike dhe sociale kanë rëndësi për funksionimin e Eurozonës por edhe për pranueshmërinë politike”, tha komisioneri për çështjet ekonomike dhe financiare, Pierre Moscovici.
Ai tha se pavarësisht fuqizimit të ekonomisë së Eurozonës, ka ende diferenca mes ekonomive anëtare. Borxhi publik i Italisë është dy herë më i madh se Holandës, papunësia e Spanjës është tre herë më e madhe se e Austrisë dhe suficiti i llogarisë Gjermane është 10% më i madh se ai i Francës.
Në aspektin e të ardhurave, 20%-shi me të ardhura më të mëdha ka fituar 5 herë më shumë se 20% i personave me të ardhura më të ulëta në vitin 2015, ndërsa thuajse 120 milionë njerëz në gjithë Bashkimin Europian, apo thuajse 25% e popullsisë, jetojnë në ekonomi familjare që përballen me rrezikun e varfërisë dhe përjashtimit social.
“Në mënyrë që eurozona të arrijë potencialin e plotë, nuk mund të vazhdojnë këto divergjenca ekonomike dhe sociale. Unioni Ekonomik dhe Monetar është mjeti jonë kryesorë për konvergjencën në rajon”, tha Moscovici. Për këtë, Moscovici tha se Komisioni po përpiqet të krijojë një buxhet të Eurozonës, që do të kanalizonte financim në rast të një recesioni, që do të ri paguhet në periudha të rimëkëmbjes ekonomike.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.