Diskutimi në “Argument” – Cilat janë trendët e punësimit në Shqipërinë e 2020-ës?
Në emisionin “Argument” nga Enio Civici, mbrëmjen e sotme po diskutohet për trendet e punësimit në Shqipërinë e 2020-ës.
Çështja e punësimit e trajtuar nga të gjitha këndvështrimet, duke filluar nga tregu i punës dhe profesionet që kërkohen në ditët e sotme, e duke kaluar tek vështirësitë që sektori publik dhe ai privat po hasin gjatë rekrutimit të punonjësve të rinj, ligji në Shqipëri për mbrojtjen e tyre dhe profesionet që sigurojnë të ardhurat më të mëdha në ditët e sotme.
Për të folur rreth këtyre çështjeve dhe trendëve të punësimit në panel ishin të ftuar katër personazhe të botës së tregut shqiptar të punësimit si Roden Papaj, Dritan Mezini, Florian Hasko dhe Renato Muçaj.
Fjala e parë iu dha z.Papaj , përfaqësues i kompanisë Deloitte, i cili theksoi nevojën e kompanive në ditët e sotme për të punësuar njerëz të cilët nuk shihen më nga mesatarja e tyre, por nga zhvillimi i aftësive që ata krijojnë jashtë ambienteve të shkollës:
“Gjithmonë punësimi i njerëzve varet nga modeli i biznesit. Kompania që unë përfaqësoj përqendrohet zakonisht tek të sapodiplomuarit. Në ditët e sotme ne nuk shohim më mesataren e notave si prioritet për rekrutimin e një personi, por mënyrën se si ka perfomuar ai në lëndë të ndryshme dhe eksperiencat jashtëkurrikulare, vullnetarizmin me të cilin është marrë. Këto janë ato aktivitete në të cilat individi jep kontributet në shoqëri dhe ku fitohen disa aftësi shumë të vlefshme. Pra, e thënë ndryshe nuk shikohen më aftësitë teknike, por aftësitë e ditura ose ato që fitohen, aftësitë njerëzorë të quajtura ndryshe, që janë edhe më të rëndësishme për tregun në të cilin operojmë sot.”
Ndërkohë i ftuari tjetër z. Hasko, partner në firmën ligjore Tashko Pustina, është shprehur se një problem që punëmarrësit në ditën e sotme kanë është mos-adresimi i problemeve në gjykatë për çështje të ndryshme teknike:
“Unë shoh një fenomen disi shqetësues në tregun e sotëm të punës. Ka pak kulturë dhe informim nga punëmarrësi në mënyrë që për problematikat gjatë orëve të punës t’i drejtohet gjykatës dhe ti adresojë ato në mënyrë serioze. Në këtë mënyrë ata lejojnë që punëdhënësi shpeshherë të përfitojë nga rasti duke i shfrytëzuar, pasi shumica nuk i di të drejtat e tyre në ambientet e punës.”
Mezini, konsulent shërbimesh dhe përfaqësues nga portali duapunë.com, foli më tepër për tendencat e përgjithshme që ndiqen në tregun e punës ditët e sotme dhe si gjithnjë e më shumë po kërkohen individë që kanë aftësi në teknologjinë e informacionit. Sipas tij, kjo fushë po avancon me hapa të shpejtë edhe në Shqipëri:
“Në tregun tonë padyshim ka ndryshime që mund të quhen edhe thelbësore. Ka shumë ndryshime me ato se çfarë kërkohet sot nga ana e kompanive në krahasim me vite më parë, por shihen edhe disa tendenca klasike, konvencionale nga punëmarrësit. Shikohet, për shembull që preferenca kryesore mbeten lëndët ekonomike si ato të shitjes, marketing, biznes, financë etj. Nga ana tjetër tregu gjithnjë e më tepër kërkon më shumë cilësi, si lëndët e teknologjisë së informacionit. Në Shqipëri ne na ka kapur tendenca disi me vonesë pasi lënda e teknologjisë dixhitale ka filluar më herët në tregun global, por padyshim kemi arritur të plotësojmë nivelin e kërkesave me kalimin e kohës.”
Ndërkohë z. Muçaj, kryetar i Sindikatës së Post-Telekomit Shqiptar, foli nga një aspekt tjetër për punësimin në Shqpëri dhe ai është pikërisht roli i sindikatave, të cilat në shumë raste janë cilësuar si jo-efektive në mbrojtjen e të drejtave të punonjësve. I pyetur nga moderatori Civici për shprehjen e kryeministrit Rama se sindikatat janë jo-funksionale në Shqipëri, ai u përgjigj se:
“Është një fjali që na vjen keq ta dëgjojmë dhe sigurisht fjala e kryeministrit për sindikatat është nga ato që të vret disi. Ka sindikata që janë operacionale në Shqipëri, por ka edhe nga ato që kanë ngelur në strukturat e vjetra dhe shpeshherë nuk funksionojnë. Tregu sigurisht po ndryshon dita-ditës, por edhe sindikatat duhet të përshtaten me kohët e sotme pasi sfidat janë të ndryshme dhe më komplekse. Për të marrë një shembull, sektori i call center po goditet në ditët e stome dhe po tkurret që nga tre vite më parë duke rënë me 11%. Ne si sindikatë kemi bërë punën tonë duke i adresuar problemet e kësaj fushe në gjykatë dhe vështirësitë që shpeshherë ky lloj biznesi has, pasi duhet luftuar që këto vende pune të mos largohen nga territori ynë. Padyshim ky shembull duhet të ndiqet nga të gjithë”
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.