Diskutimi në “Argument” – Kur do të bëhet reforma zgjedhore dhe çfarë pritet prej saj
Në emisionin “Argument” këtë të enjte nga Enio Civici u diskutua mbi një temë, e cila në pak kohë është kthyer në një ‘betejë’ ku forcat kryesore politike në vend po luftojnë me ngulm, por që ende nuk kanë prodhuar një kompromis.
Për të folur rreth kësaj teme të ftuar në panel ishin Ralf Gjoni, Kristaq Kume, Arjan Durmishi dhe Endri Shabani.
Shqipëria në historinë e saj të pluralizmit ka aplikuar deri më tani 4 lloje të sistemeve zgjedhore. I fundit që qëndron në fuqi është sistemi proporcional rajonal, i kryer nga marrëveshja Berisha – Rama në vitin 2009.
Sipas Arjan Dyrmishit, Drejtor Ekzekutiv në Institutin e Studimeve të Demokracisë dhe Qeverisjes ndryshimi i shpeshtë i sistemeve është një anomali:
“Ndryshimi kaq i shpeshtë i sistemeve zgjedhore tregon se ka një anomali. Forcat politike në pushtet ndikojnë në këtë rrugë dhe kjo duhet patjetër të ndryshojë. Forcat politike në Shqipëri duhet të shkojnë drejt opsioneve të reja, si sistemi me lista të hapura, ku njerëzit do të kenë mundësinë të votojnë individët dhe jo partitë.”
Më tej fjalën e ka marrë ish-kryetari i KQZ-së, Kristaq Kume, i cili në fjalën e tij kishte një parim kryesor, se kjo reformë e rëndësishme duhet të bëhet me një dakordësi të plotë nga të gjithë palët e përfshira:
“Partitë shqiptare duhet të vendosen nën presion. Duhet të marrim të gjithë pjesë në këtë proces dhe askush të mos jetë indiferent. Për mua e rëndësishme është që të bëhet ajo çfarë duhet dhe jo çfarë kemi në mendje. Kjo gjë mund të bëhet dhe e gjitha çfarë kërkohet është vetëm vullneti i fortë. Nuk duhet që kjo reformë të kalojë vetëm me një votim të shumicës, por me një dakordësi të plotë të palëve, ndryshe nuk ka asnjë vlerë.”
Fjalën më pas e ka marrë eksperti i çështjeve ligjore dhe aktivisti i njohur Endri Shabani. Në argumentin e tij, zoti Shabani tha se në Shqipëri janë shtruar të gjitha shinat për të pasur autoritarizëm nga ana e liderëve:
“Në Shqipëri, po të bësh një vështrim në historinë politike duket sikur janë shtruar të gjitha shinat për të pasur në pushtet liderë autoritarë. Kjo gjë nuk do të ndryshojë, nëse ne nuk ndryshojmë strukturën ligjore. Reforma Zgjedhore për mua është një hap i duhur, por nuk mjafton. Duhen edhe hapa të tjerë për të garantuar tërësisht demokracisë.”
Më optimisti në panel ishte deputeti i Kuvendit të Shqipërisë, Ralf Gjoni, i cili ndan bindjen se në 2021 do të votohet me një sistem të ri zgjedhor:
“Deri në Mars kemi kohë për të bërë ndryshimet ligjore dhe për të votuar mbi Reformën. Unë padyshim mbështes parafolësit e mi, kur thonë se duhet një dakordësi e plotë mbi këtë çështje dhe se kjo nuk mund të bëhet pa vullnetin politik të të gjitha palëve pjesëmarrëse në sistem. Pasi të kalojmë këto hapa të vështira ligjorë dhe diskutimesh, unë besoj se në 2021 ne të gjithë do të votojmë në një sistem të ri zgjedhor.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.