Diskutimi në “Argument” – Operacioni Forca e Ligjit, çfarë do të thotë për Shqipërinë nisma ligjore
Në mbrëmjen e sotme në emisionin “Argument” nga Enio Civici është diskutuar rreth një prej temave që ka “pushtuar” titujt e mediave shqiptare, pikërisht paketa ligjore “Anti-KÇK” dhe që në përbërje të saj është shoqëruar edhe me strukturën speciale të Policisë së Shtetit “Operacioni Forca e Ligjit”.
Këto nisma pritet të sfidojnë grupet e strukturuara kriminale në bashkëpunim edhe me organet e reja të drejtësisë si SPAK dhe BKH në një mënyrë krejtësisht të re, duke ndjekur paratë dhe pronat e patundshme të njerëzve të dyshuar dhe me precedentë penalë.
Teksa pritshmëritë nga ana e mazhorancës janë të larta për efektivitetin e paketës, opozita ka lëshuar disa kritika duke e cilësuar këtë si “show” i radhës i qeverisë dhe kryeministrin si bashkëpunëtor me krimin.
Të ftuar për të folur rreth kësaj teme në studio ishin Adnor Shameti, Ermal Hasimja, Ledio Braho dhe Klodian Muço.
Adnor Shameti, deputet i Partisë Socialiste dhe Doktor Shkencash në Juridik, ka shpjeguar se akti normativ “Anti-KÇK” është një ndihmë në funksion të organeve të reja të drejtësisë dhe se është në harmoni me të gjithë ligjet e tjera, duke mos marrë kompetenca nga asnjë institucion:
“Nuk ka asgjë të jashtëzakonshme në tërë këtë proces, si në nxjerrjen e aktit normativ. Operacioni Forca e Ligjit është vetëm një sektor në Policinë e Shtetit. Thelbi i kësaj nisme është ndihma dhe koordinimi i Policisë së Shtetit në bashkëpunim me organet e reja të drejtësisë. Ka afat deri në 1 vit për veprimin e këtyre aksioneve të ndërmarra nga OFL-ja. Më pas, Byroja Kombëtare e Hetimit do të futet në lojë, për hetimin e të gjitha rasteve. E reja që duhet sqaruar është se thelbi i këtij akti normativ është që të ndiqen paratë e krimit dhe duke e paralizuar atë përmes këtyre masave. Jemi në një gjatësi valë me partnerët tanë si BE-ja dhe Amerika për miratimin e këtij ligji.
Nuk bëhet dublimi i institucioneve dhe marrja e kompetencave. SPAK-u është strukturë e re e prokurorisë, kemi gjithashtu ligjin Anti-Mafia dhe ky akt normativ i ri, nuk vjen në kundërshtim me këto struktura, por është në harmoni. Lëndën që Prokuroria e merrte nga media apo informacione të ndryshme, tashmë Policia e Shtetit nëpërmjet Drejtorit të Përgjithshëm do t’ja bëjnë lëndën gati Prokurorisë. Është kundërshtuar se merren kompetencat e organeve, por autoriteti i Drejtorit dhe OFL-së bën vetëm njoftimin administrativ dhe mund të vendosin kushte të posaçme si sekuestro, por jo të japin vendime.”
Ndërkohë, pedagogu i Shkencave Politike Ermal Hasimja, ka shprehur dyshimet e tij për këtë nisëm duke vënë theksin tek fakti se pse është pritur kaq gjatë për diçka të tillë:
“Mua më duket sikur me këtë nisëm deri më tani ne nuk kishim mundësi të luftonim me krimin dhe po prisnim këtë ditë, përfundimin e mandatit të dytë të qeverisë për ta bërë.
Ka disa kontradikta, teksa qeveria e ka mohuar fuqinë e krimit të organizuar, ndërsa tani kemi konstatuar se kemi arritur në kohëra ekstreme dhe duhen masa ekstreme.
Në rastin konkret dyshimi im është se, në qoftë se ne duhet të presim deri tek mandati i dytë për të nisur një luftë ekstrem drejt një klime të ashpër kriminale, pse duhet të besoj unë që këta që nuk e luftuan deri më tani, do ta bëjnë me këtë organizim të ri. Çfarë instrumenti i mungonte Shqipërisë për të luftuar pasurinë e kriminelëve? Kemi parë kryeministrin që i ka mbrojtur njerëz të botës së krimit, prandaj mua më duket më tepër një proces shfaqje, se sa diçka që në mënyrë efikase do luftojë krimin.”
Klodian Muço, pedagog dhe publicist në fushën e ekonomisë, ka shprehur shqetësimin e tij për pasurinë e grumbulluar kriminale në Shqipëri dhe shumat e mëdha të grumbulluara që kanë sjellë edhe probleme të tjera, si inflacioni i ulët dhe forcimin e valutës së lekut:
“Të matësh ekonominë kriminale është shumë e vështirë. Në çdo vend të botës bëhen disa supozime. Në Shqipëri, për shembull Banka Botërore në një raport të saj disa vite më parë, u shpreh se aktiviteti kriminal në Shqipëri arrinte 5 milion dollarë, gati sa 1/3 e GDP-së.
Dy vitet e fundit shohim një rënie të vazhdueshme të valutës së euros, që po çon në nivele të ulëta inflacioni, po dëmton eksportet dhe indikatorë të tjerë, dhe ne shohim se as Banka e Shqipërisë nuk jep dot një shpjegim sepse kjo po ndodh.
Një kontribut të rëndësishëm në forcimin e lekut jep ekonomia informale apo paratë që vijnë nga jashtë. Flitet që janë rreth 400 milion euro që hyjnë në Shqipëri dhe se një pjesë e tyre del sërish jashtë. Në tregun e Tiranës ka një rritje 80% të ofertës së ndërtimit ndërsa kjo nuk reflektohet në kërkesë nga konsumatorët. Prandaj, dalim te kryeministri që thotë se duhen masa ekstreme.”
Ledio Braho, ekspert në fushën e Juridikut, shpjegoi se ky ligj nuk kishte asnjë nevojë për tu bërë kaq emergjente dhe se ky aksion do të shtojë volumin e punës së Prokurorisë së re speciale, SPAK:
“Aspekti ligjor i këtij akti normativ nuk kishte asnjë arsye që të bëhej emergjencë. Kjo platformë ishte shpallur që në nëntor. Ishte supozuar si një procedurë normale në parlament.
Nëse jemi në kushtet e emergjencës, atëherë duhet të pranohet që krimi ka pushtuar vendin, dhe nuk mund të aplikosh të njëjtat kushte emrgjente me të njëjtët njerëz në postet kyçe. BKH-ja nuk ka asnjë varësi nga Ministria e Brendshme, por direkt nga SPAK-u. Ne e dublojmë me “OFL-në” në varësi të saj së bashku me SPAK-un, varësinë e këtij institucioni. Gjykata Kushtetuese e konstatoi si anti-kushtetuese disa kohë më parë këtë nismë, sepse nuk mundet që përgjimi dhe hetimi të jenë në varësi të ekzekutivit. SPAK-u ka shumë pak punonjës dhe ka shumë punë për të bërë. Punë me peshq të mëdhenj të politikës. Sikur ta linin SPAK-un të merrej me atë punë, me numrin e kufizuar të prokurorëve që ka do kishte rezultate, ndërsa tani deri në fund të vitit ky institucion do të merret vetëm me këto procedura.”
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.