Diskutimi në “Argument” – Palët politike ulen në një tryezë, por a do të prodhojnë një reformë?

Në mbrëmjen e sotme në emisionin “Argument” nga Enio Civici tema që po diskutohet është ajo e konflikteve politike dhe pasojat që rrjedhin prej tyre në aspektin ekonomik dhe social.

Reforma zgjedhore dhe ulja e palëve në tryezë ishte padiskutim ngjarja që dominoi javën e aktualitetit shqiptar, e cila u përshëndet nga të gjithë faktorët ndërkombëtarë.

Por, pyetja që “Argument” guxon të bëjë në mbrëmjen e sotme është fakti nëse kjo tryezë zgjedhore midis palëve ka mundësi të kthehet në një reformë domethënëse në të ardhmen.

Të ftuar në studio për të folur rreth kësaj teme janë Kristaq Kume, Aleksandër Çipa, Ben Andoni dhe Fatos Çoçoli.

Ish-kryetari i KQZ-së, Kristaq Kume në fjalën e tij u shpreh se për tryezën nuk kishte asgjë për tu duartrokitur dhe se sipas tij ende nuk ka një rezultat të prekshëm nga reforma. Sipas tij dialogu ishte i vetmi rezultat i kënaqshëm:

“Fakti që u ulën për të vazhduar diçka atje ku e kanë lënë është për mendimin tim një lajm i mirë. Nuk është ngjarje që duhet përshëndetur, pasi në vlerësimin tim nuk kanë bërë asgjë më shumë dhe pak, por thjesht detyrën e tyre. Prandaj i kemi zgjedhur politikanët për të vendosur rregulla dhe për të qeverisur, ndërsa ky takim është pjesë e detyrës së tyre. Gjatë këtyre kohëve kanë konsumuar shumë fjalë dhe energji, ndërsa rezultati është jo vetëm larg pritshmërive por akoma nuk kemi një diçka të prekshme për të gjykuar rreth reformës. Kjo tryezë theu akullin e mos-komunikimit, duke filluar dialogun si të nevojshëm, por se sa do të arrihet të realizohet ajo që kërkohet jo vetëm nga ndërkombëtarët, por edhe nga ne shqiptarët ende nuk dihet. Po ashtu nuk kam pse të shprehem me terma optimiste dhe entuziaste.”

Ndërkohë, Aleksandër Çipa, kreu i Unionit të Gazetarëve u shpreh se palët duket se kanë një dakordësi midis tyre për të mos ndryshuar rregullat e sistemit:

“Kjo është një tryezë që nuk mund të përjashtohet nga konteksti i krizës 9-mujorëshe në realitetin politik të vendit. Ky ishte një nga momentet më kruciale të politikanëve tanë. Jemi në një absurd politik, ku opozita institucionale e vendit është jashtë institucioneve për më shumë se 9 muaj. Ulja në tryezë është rikthim në normalitet, ndoshta është e tepërt ta quajmë fitore këtë takim, por ky është një vendim i imponuar prej politikës. Më ka bërë përshtypje, pasi aktorët pas daljes nga kjo tryezë u shprehën se ishin të gatshëm për rregullimin e stilit zgjedhor dhe nuk folën më për stilemën e saj. Reforma zgjedhore nënkupton përmbysjen e shumë gjërave nga sistemi elektoral aktual, por ky vullnet nuk u pa prej tyre.”

Fatos Çoçoli, ekspert i mirënjohur ekonomie, u shpreh se takime të tilla mes palëve janë për tu përshëndetur dhe se kanë ndikim direkt në ekonomi, pasi nuk prodhojnë konflikt:

“Unë do ta kundërshtoj profesorin Kume, pasi unë e brohoras nismën. Kur ulen këta zotërinjtë në tryezë, konsumi i qytetarëve rritet. Rritet konsumi përsa kohë politika jonë nuk prodhon tension dhe shumë herë tërësisht artificial. Mbështes atë që tha një nga njohësit tanë më të mirë të sistemit elektoral , siç është profesor Kume. Në fjalën e tij nëse e vutë re ai nuk e përmendi kurrë fjalën reformë dhe kur një njohës i ndryshimeve thelbësore që ka pësuar sistemi ynë, e shmangu totalisht si fjalë, do të thotë se diçka nuk shkon. Takimi mendoj se ishte Ky një moment kur palët kanë ulur armët e dyluftimit politik dhe tashmë kanë veshur jelekët e mëndafshtë. Është një show që i bën mirë ekonomisë dhe patjetër janë të mirëpritura.”

Gazetari Ben Andoni shpjegoi se ulja në tryezë dhe reforma zgjedhore përmbajnë brenda saj shumë paradokse të situatës aktuale politike:

“Na është dashur ta përsërim shpesh. Nëse nuk do ndodhte tërmeti i shtatorit dhe i nëntorit kjo tryezë do të ndodhte shumë më përpara. Gjë e cila nuk më pëlqen tek takimi është se tensionet politike vazhdojnë të zgjidhen ende nga të huajt. Mjaftonte të shikoje pjesën koreografike të takimit për të kuptuar se pjesëmarrësit ishin thjesht kukulla që luhen nga të tjerët. Reforma zgjedhore në Shqipëri kërkon një angazhim shumë të madh që të marrë emrin reformë. Ndërsa nga qasjet e ndryshme të opinioneve të këtyre, ata ende nuk kuptojnë formatin e takimit. Ndërkohë, që paradoksi i madh është se këta njerëz janë ulur, por ndërkohë ndodhen jashtë institucioneve. Vendi jonë ka kohë që jeton me anormalitete dhe këta zotërinjtë sollën një anormalitet tjetër pasi do të prezantojnë një reformë totalisht “make-up”. Një reformë që do votohet në parlament, ndërkohë opozita është jashtë tij. Brenda opozitës ka shumë kanale dhe tashmë është momenti që të tregojnë veten. Kushti kryesor i opozitës brenda parlamentit është ndryshimi i sistemit.”

Geri Kolgega / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.