Diskutimi në “Argument” – “Turizmi pas tërmeti”, cilat janë sinjalet që duhet të dërgojmë për rimëkëmbjen

Në emisionin “Argument” të mbrëmjes së sotme është folur pikërisht për aspektin se si fatkeqësia natyrore e 26 nëntorit, mund të kthehet në një forcë ekonomike.

Duke qenë se tërmeti goditi një nga zonat më të fuqishme ekonomike shqiptare si qarku i Durrësit, i cili prodhon rreth 10% të PBB-së së përgjithshme kombëtare, padyshim masa të veçanta duhet të merren ringritjen e tij.

Për të folur rreth kësaj teme në studio ishin disa prej operatorëve kryesorë në turizmin e Durrësit, të cilët kanë ndarë mendimet e tyre për rimëkëmbjen e këtij sektori jetik për vendin, si Kliton Gërxhani, Enver Mehmeti, Fatos Çerenishti dhe Oltion Caci.

Si fillim të të ftuarit kanë rënë parimisht dakord që goditja e 26 nëntorit qe jo e vogël për sektorin e turizmit. Sipas tyre është dëmtuar fillimisht gjendja psiko-sociale e njerëzve, që padyshim do lërë pasoja edhe në ekonomi.

Më pas, duke marrë shkas nga krahasimi i të ardhurave në 3 mujorin e tretë të 2018-ës me atë të 2019-ës, statistikat tregojnë që të ardhurat janë rritur. Pyetjes së moderatorit Civici se nëse ne do të vuajmë pasojat nga tërmeti, z.Caci i është përgjigjur:

 “Shpresojmë që jo. Fillimisht le ta ndajmë në kategorizime, turizmin vendas dhe ai i huaj. Vendasi e ka përjetuar më shumë dhe kanë më shumë informacion rreth zonave ku ndodhi, e kanë sensin e tërmetit dhe e pranojnë si fakt. Kjo me të drejtë, pasi ka shumë vite pa ndodhur një tërmet i përmasave të tilla dhe ka ndodhur ky shok psikologjik tek ta, që shpresojmë të mos zgjasë. Duhet që njerëzit ta kuptojnë se rikthimi i tyre drejt normalitetit është jetik dhe ne të gjithë si operatorë duhet të luftojmë për të kthyer sigurinë tek ta.”

Kliton Gërxhani, i cili është edhe kryetari i Operatorëve Turistikë Shqiptarë, pyetjes së moderatorit Civici nëse disa prej prenotimeve nga operatorët e huaj janë anuluar i është përgjigjur se:

“Deri më tani nuk ka pasur anullime dhe për momentin është një fazë ku operatorët e huaj po vëzhgojnë çfarë po ndodh dhe masat që do të merren. Fenomene të tilla dhe duke futur edhe imazhin e dobët që ka Shqipëria si fenomen turistik, padyshim ndikojnë. Gjithçka do varet shumë nga sinjalet që ne do të dërgojmë tek ata. Gjëja më e keqe pas sistemimit të njerëzve, përsa i përket bizneseve është që ta kalojmë me një rrahje shpatullash. Ky tërmet duhet të na shkundë për ato çfarë kemi bërë gabim. Papërgatitja nga tërmeti e tregoi qartë se kemi mungesa në aspektin e sigurisë. Ajo që duhet të ndodhi tashmë është të ulemi me njëri-tjetrin dhe me qeverinë, për të skanuar situatën se kush janë godinat e duhura dhe ato që nuk janë. Pra, mesazhi që ne duhet të dërgojmë është të fortifikojmë godinat, të cilat sigurojnë masat e duhura. Kjo mund të bëhet nëpërmjet certifikatave nga ekspertët e sigurisë.”

Ndërkohë Enver Mehmeti e ka shpjeguar situatën në Durrës nga ana e efektit që imazhi i turizmit ka marrë në këtë vend. Sipas tij goditja e tërmetit ishte mjaft negative, por tashmë është mundësia për tu ringritur sërish edhe më të fortë:

“Atë që ndodhi unë dua ta ndaj në dy pjesë, periudhën e tërmetit dhe post-tërmetit. Turizmi ka qenë industria më në rritje dhe zona që ne po flasim është ndër më elitaret dhe me shumë fiziblitet. Kjo zonë po shkonte gjithnjë e më shumë drejt rritjes ekonomike dhe këtë vit po përpiqeshim të rrisnim “brandin” e markës tonë dhe për ironi goditemi. Sensibilizimi ka qenë mjaft i madh me akomodimin e mijëra personave nga bizneset e Durrësit kjo duhet thënë . Nuk duhet të jemi naivë, por të bëjmë detyra shtëpie të jashtëzakonshme. Tregu i turizmit është shumë sensibël dhe marka goditet me gjëra shumë të vogla. Unë kam shprehur mendimin për lirimin e vijës së parë të plazhit. Ne kemi shpesh kontrolle nga agjentët e operatorëve të huaj për sjelljen tonë, sepse tregje si Polonia, Çekia, Suedia duan siguri dhe përgatitje. Kemi propozuar gjithashtu tek Ministria e Turizmit, që të mbledhim të gjithë operatorët e huaj në një konventë dhe t’i tregojmë një peizazh tjetër të Durrësit dhe masat që do të ndërmarrim.”

Ndërkohë, z. Fatos Çerenishti ka treguar situatën në terren përgjatë vijës bregdetare të Durrësit duke shpjeguar se shumë hotele e kalojnë testin e sigurisë dhe kjo jep një garanci të madhe për të ardhmen e turizmit:

“Përveç dëmit të madh, shumica e hoteleve kanë treguar qëndrueshmëri dhe janë me struktura mjaft të forta. Përveç rasteve sporadike shumica e godinave në gjirin e Durrësit kanë qenë mjaft solide. Tashmë mendoj se duhet të hymë në fazën e certifikimit të hoteleve. Nuk besoj se do të fillojë sezoni pa marrjen e këtyre certifikatave. Ne investuesit privatë do të marrim gjithashtu iniciativa për të siguruar të gjithë strukturat tona dhe për të mbrojtur më mirë investimin tonë. Deri më tani duhet thënë se nuk ka pasur anulime nga operatorët e huaj, por duhet të tregohemi të kujdesshëm me sigurimin e situatës në vazhdim.”

Ndërkohë z.Çaçi ka pasur edhe një thirrje mjaft simbolike për atë që ai e quajti aktivizimin e  turizmit të brendshëm:

“Sot kemi nevojë për turizmin e brendshëm dhe jo të jashtëm. Sot e kemi të nevojshme që të na frekuentojnë njerëzit e vendit tonë, pasi i japin fuqi të madhe të gjithë zonës për ta shplodhur nga stresi psiko-social dhe çlirimin e energjisë negative. Këtu duhet treguar patriotizmi që t’i japë shpresë zonës dhe t’i japë forcë gjithë këtij sektori, që është burim të ardhurash për të gjithë shqiptarët.”

Geri Kolgega / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.