Dita e Turizmit, përurohet Qendra e Vizitorëve në Radhimë – Do të vendosen edhe në 3 parqe kombëtare

Në ditën Botërore të Turizmit, u përuruar në Radhimë të Vlorës Qendra e Vizitorëve. Kjo qendër krahas funksionit të info-point do të shërbejë edhe si një mini muze, duke i njohur turistët me pasuritë tokësore e detare të vendit, si edhe me traditat e kulinarinë.

Gjatë ceremonisë u bë edhe prezantimi i 3 modeleve të Qendrave të reja të Vizitorëve që do të vendosen në Parqet Kombëtare të Llogarasë, Divjake-Karavasta dhe Dajtit, përmes projektit NaturAl të BE.

Të pranishëm në event ishin Ministri i Turizmit dhe Mjedisit Blendi Klosi, autoritetet vendore të Vlorës, partnerët për zhvillim, rejnxhërsat e Administratës vendore të Parqeve dhe përfaqësues të komunitetit.

Këta të ftuar vlerësuan bukuritë natyrore, biodiversitetin dhe ekosistemet në zonat e mbrojtura të Shqipërisë si destinacione të rëndësishme turistike dhe theksuan se qendrat e reja do të ofrojnë shërbim dhe informacion cilësor për turistët vendas dhe të huaj.

Ndërsa një ekspozitë në mjediset e Qendrës së Vizitorëve në Llogara promovoi rëndësinë e mbrojtjes së mjedisit natyror, duke vënë në pah vlerat dhe përfitimet që i sjellin komunitetit dhe shoqërisë në tërësi.

A.H./SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.