Dita Ndërkombëtare e të Drejtave të Njeriut – Bushati: Shqipëria e përkushtuar për mbrojtjen e të drejtave të njeriut

Me rastin e Ditës Kombëtare të të Drejtave të Njeriut, Ministri për Europën dhe Punët e Jashtme në një deklaratë tha se kjo ditë përbën një moment të veçantë në kalendarin tonë.

Ai e cilëson këtë ditë jo vetëm si një ditë kremtimi për trashëgiminë e vyer dhe traditën e shëndoshë që njerëzimi ka arritur në mbrojtjen dhe respektimin e të drejtave të njeriut, por edhe si një moment të rëndësishëm reflektimi.

“Sfidat e ndryshme, së pari ato në fushën e sigurisë, vështirësitë ekonomike apo ritmet e zhvillimeve ndërkombëtare vazhdojnë të venë në sprovë shkallën e mbrojtjes dhe respektimin e të drejtave themelore të njeriut.

Çmimi që shoqëritë kanë paguar dhe përpjekjet e mëdha për liri dhe demokraci nuk duhet të lejojnë asnjë erozion të të ​drejtave të individit. Historia ka treguar se kudo, paqja, stabiliteti dhe prosperiteti ekonomik garantohen realisht vetëm nga demokracia, sundimi i ligjit dhe respektimi i plotë i të drejtave të njeriut”, shprehet më tej Bushati.

Bushati gjithashtu tha se zbatimi i reformës së thellë në drejtësi do të garantojë një shkallë më të lartë të zbatimit të shtetit ligjor por edhe të mbrojtjes së të drejtave e lirive në vend dhe se miratimi i ligjit së fundmi nga Kuvendi i Shqipërisë, për të drejtat e pakicave kombëtare përbën një nga instrumentet më të avancuar në këtë fushë në hapësirën evropiane.

“Këtë vit Shqipëria mbylli me sukses mandatin e saj të parë si anëtar i Këshillit të të Drejtave të Njeriut të OKB-së, gjatë të cilit kontribuoi, se bashku me vendet partnere për të nxitur e mbrojtur të drejtat dhe liritë themelore të njeriut në botë.

Shqipëria do të mbetet e përkushtuar për mbrojtjen e të drejtave të njeriut, duke përmirësuar instrumentet që garantojnë të drejtat dhe liritë shoqërore e individuale”, tha ministri.

V.H/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.