Divergjencat e shteteve të BE – Buxheti, ndasi mes vendeve të varfra e të pasura
Liderët e Bashkimit Europian dështuan të arrijnë një marrëveshje mbi buxhetin e përbashkët në takimin e kësaj Jave, për shkak të mospërputhjeve ndaj përmasës mes vendeve të pasura e të varfra, si dhe mbi orientimin e shpenzimeve.
Disa vende kërkojnë financim shtesë për të luftuar ndryshimin klimatik dhe trajtuar emigracionin, ndërsa të tjerë kërkojnë vazhdimin e fondeve drejt zhvillimit dhe bujqësisë.
Debati u përqendrua edhe tek mbushja e “gropës” fiskale prej 75 miliardë euro e lënë nga dalja e Britanisë.
Propozimi bazë për të vendosur një tavan tek buxheti 2021-2027 në 1.074% të të ardhurave kombëtare bruto të Bashkimit Europian, apo 1.09 trilionë euro, u përball me kritika nga të gjitha anët.
E ashtuquajtura katërshja kursimtare, Austria, Holanda, Danimarka dhe Suedia, kërkojnë një tavan të buxhetit në 1% të PBB dhe refuzojnë të paguajnë më shumë për të kompensuar daljen e Britanisë.
Homologët më pak të zhvilluar janë përfituesit kryesorë të fondeve të BE dhe kërkojnë vazhdimin e ndihmave të mëdha.
Përveç përmasës së buxhetit, pika të tjera të konfliktit ishin orientimet e shpenzimeve. Anëtarët më të varfër të Lindjes dhe Jugut kërkojnë vazhdimin e ndihmave në zhvillim dhe mbështeten nga Franca, Irlanda dhe vende të tjera që kërkojnë përkrahjen e subvencioneve të mëdha të bujqësisë.
Gjermania, Holanda dhe vende të tjera, synojnë të kanalizojnë fondet drejt prioriteteve të reja, përfshirë ndryshimin klimatik, emigrimin dhe ekonominë dixhitale.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.