Do deklarojnë pritësin, biletat, paratë – Urdhëri i Lleshajt: Azilkërkuesit shqiptarë për vendet e BE do bllokohen që në kufi

Qeveria ka vendosur të bllokojë që në dalje të kufirit shqiptar azilkërkuesit e mundshëm për në vendet e Bashkimit Evropian dhe zonës Schengen. Një urdhër i lëshuar nga Ministri i Brendshëm Sandër Lleshaj më 20 dhjetor dhe i publikuar tashmë në Fletoren Zyrtare synon të pengojë që në kufi personat që kanë qëllim të kërkojnë azil në Evropë.

Urdhëri synon të forcohet kontrolli i shtetasve shqiptarë në dalje të kufirit shtetëror, që nuk plotësojnë kushtet e udhëtimit për hyrjen dhe qëndrimin në vendet e Bashkimit Evropian dhe zonës Schengen, duke kryer verifikime dhe intervistime të detajuara, për:

a) adresën e saktë të akomodimit në vendin e destinacionit ku do të shkojë;

b) ftesën e pritësit në vendin e destinacionit (që përmban të dhënat, kontaktet e pritësit);

c) biletën apo rezervimin për kthimin;

d) mjetet financiare për mbulimin e shpenzimeve për kohën e qëndrimit.

Lleshaj urdhëron gjithashtu të forcohet kontrolli në kufi, ndaj operatorë e turistikë (linja autobuzësh, zyra turistike etj.), grupe familjarësh, me qëllim parandalimin e rasteve të abuzimit me të drejtën e lëvizjes së lirë dhe goditjen e organizatorëve të këtyre udhëtimeve me destinacion vendet e Bashkimit Evropian.

Në funksion të kontrollit dhe verifikimit kufitar, ndaj të gjithë shtetasve shqiptarë që kanë shënime, njoftime dhe informacione të autoriteteve ligjzbatuese, të shfaqura automatikisht ose me kërkim në sistemet elektronike, si dhe ato që vijnë në formë shkresore, është e nevojshme kryerja e një kontrolli dhe verifikimi kufitar të vijës së dytë minimal ose tërësor, sipas rastit, apo të kalohet në verifikim të hollësishëm.

Ndërkohë në një sitë shumë më të imët do të kalojnë shtetasit shqiptarë me precedentë penale apo që kanë thyer më parë afatet e qëndrimit në vendet e Bashkimit Evropian. “3. Të gjithë shtetasit shqiptarë të kategorisë “Inad”, gjatë dy viteve të fundit, nga data e paraqitjes në Pikat e Kalimit Kufitar, për shkak të masës së ndalimit të hyrjes në zonën “Schengen”, me arsyetimin “Për informacione në SIS”, “Refuzim azili”, dhe “Rrezik për sigurinë publike” dhe të gjithë shtetasit shqiptarë të kategorisë “Deportiv” gjatë tre viteve të fundit, nga data e paraqitjes në PKK, për shkak të çdo lloj arsye dhe janë të regjistruar në sistemin TIMS si të tillë, të mos lejohen të kalojnë kufirin shtetëror deri në paraqitjen e një dokumenti shkresor, të përkthyer në gjuhën shqipe dhe të noterizuar, që provon se nuk kanë ndalim hyrje, urdhër largimi ose dëbimi në vendet e Bashkimit Evropian dhe zonën Schengen.”, thekson Urdhëri i Ministrit të Brendshëm.

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.