Dobësohet industria gjermane – Prodhimi në rënie gjatë Korrikut, falë energjisë

Prodhimi industrial në Gjermani u regjistrua në nivele të pandryshuara gjatë Korrikut, tregojnë të dhënat e fundit. Rritja e prodhimit në ndërtim dhe manifakturë u zhbë nga rënia e sektorit energjetik.

Të dhënat sinjalizojnë se, fabrikat do të kontribuojnë me një hap më të ngadaltë në rritjen ekonomike gjatë tremujorit të tretë të këtij viti. Prej kohësh, konsumi i ka zënë vendin tregtisë dhe prodhimit si lokomotiva e ekonomisë gjermane.

Punësimi pranë kapacitetit të plotë, rritja reale e pagave dhe normat e ulta të interesit po nxisin gjermanët që të shpenzojnë.

Një ditë më parë ndërkohë, të dhënat tregonin një rënie të porosive industriale gjatë Korrikut. Sa i përket prodhimit industrial, të dhënat e Korrikut vijnë pas një rënie me 1.1% gjatë muajit Qershor.

Ekspertët shprehen se, këto të dhëna vënë në pikëpyetje forcën reale të ekonomisë më të madhe të Europës.

Sektori energjetik i ka dhënë goditjen më të madhe industrisë, pasi regjistron një rënie të prodhimit me 4.7%, që është edhe rënia më e madhe që prej Janarit të vitit 2011.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.