Dollari do të qëndrojë i fortë- Të paktën edhe për 6 muaj, pavarësisht luftës tregtare
Fuqizimi i dollarit pritet të vazhdojë në vitin e ardhshëm dhe sipas një sondazhi të Reuters, arritja e një marrëveshjeje të pjesshme tregtare mes Kinës dhe Shteteve të Bashkuara mund t’i heqë valutës vetëm 1-2% të vlerës.
Shpresat e arritjes së një marrëveshjeje mes 2 ekonomive më të mëdha në botë për të përfunduar luftën tregtare 16 mujore, kanë rritur tregjet e aksioneve në nivele rekord të larta.
Qasja pozitive drejt rrezikut ka bërë që indeksi i dollarit, që mat performancën kundër valutave të tjera kryesore, të tregojë humbjen e parë mujore që prej Qershorit.
Megjithatë, dollari ndodhet ende në rritje me 2% nga fillimi i vitit. Spekulatorët e valutave kanë përfituar nga optimizmi në tregje dhe reduktuar bastet ndaj dollarit, duke e çuar vlerën totale të pozicioneve të blerjes të dollarit në nivelin më të ulët në 2 muaj.
Megjithatë, sipas një sondazhi për javën e parë të Nëntorit nga Reuters, ky trend nuk pritet të vazhdojë. Sipas analistëve, optimizmi për zbutjen e luftës tregtare nuk pritet të zgjasë.
Thuajse 2/3 e të 56 analistëve të anketuar thanë se dominimi i dollarit pritet të zgjasë edhe për të paktën 6 muaj.
Ndër faktorët që ka ndihmuar valutën e gjelbër është performanca e ekonomisë së Shteteve të Bashkuara, që ka qenë më e mirë se vendet homologe.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.