Dollari, Shqipëria rekord në rajon – BERZH: Të dytët në listën e vendeve ku ka pësuar rënien më të madhe
Nuk është vetëm euro që është zhvlerësuar ndjeshëm me monedhën vendase, por edhe dollari amerikan, të dhënat më të fundit të Bankës Europiane për Rindërtim dhe zhvillim tregojnë se, mes vendeve ku banka operon, dhe disa ekonomive në zhvillim, në total 33 shtete, Shqipëria është vendi ku monedha vendase ka pësuar rritjen e dytë më të madhe në krahasim me dollarin.
Me një normë lehtë më të lartë është vetëm Moldavia. Siç e tregon qartë edhe grafiku, gjatë 12 muajve të fundit, leku vendas është forcuar me 17% kundrejt dollarit amerikan.
Por, nga ana tjetër, Banka Europiane për Rindërtim dhe Zhvillim sqaron se, kjo ecuri, pra dobësimi i dollarit ndaj monedhave kombëtare të këtyre vendeve ka pasur një impakt tejet pozitiv në kushtet e financimit, duke favorizuar kështu kreditimin.
Tashmë, në tregun vendas, kursi i këmbimit mes dollarit dhe lekut fiksohet në një mesatare prej 106.5 lekësh.
Nga ana tjetër, ecuria e kursit të këmbimit, sidomos mes euros ka shkaktuar mjaft debat në opinionin publik vendas. Gjithsesi, në të dyja rastet efektet negative të forcimit të monedhës vendase shoqërohen me efekte të tjera pozitive, si rritja e kreditimit apo zhvlerësimi i importeve.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.