Domatet nga Shqipëria shiteshin si siçiliane! Bllokohet ngarkesa 200 kuintalë, procedohet penalisht autori i mashtrimit
Guardia di Finanza ka sekuestruar 200 kuintalë domate me origjinë nga Shqipëria, të cilat shiteshin në tregun vendas si siciliane.
Hetimi i rajonit të Raguzës ka nisur pas një sinjalizimi nga Ministria e Politikave Bujqësore. Pas një kontrolli në magazinat e një biznesi që shiste fruta dhe perime, janë gjetur mospërputhje në etiketat e origjinës së domateve dhe pronari nga Vittoria është denoncuar për mashtrim.
Biznesi kishte blerë 200 kuintalë domate nga Shqipëria, të cilat në letra, pas mbërritjen në portin e Barit, duhet të shkonin në tregun e fruta-perimeve në Padova.
Në fakt i gjithë malli u ridrejtua në Vittoria dhe iu shit supermarketeve dhe tregtarëve si domate nga Sicilia. Për shkak të pamjes së ngjashme me domatet italiane, në një periudhë kur çmimet ishin mjaft të larta, tregtari arriti të përfitonte 20 mijë euro.
Ndërsa produkti i cili ishte destinuar për në veri të Italisë, rezulton të ketë qenë i cilësisë tepër të ulët. Duke qenë se porosia në Padova kishte qenë në sasi të mëdha, tregtari tashmë i akuzuar, kishte menduar se nuk do të vihej re ndryshimi i cilësisë.
Përfaqësuesi i kësaj shoqërie është denoncuar për mashtrim në tregti dhe indikime false të vendit të origjinës për produkte agroushqimore.
Për të lexuar artikulin e plotë: Kliko këtu
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.