Dorian i “afrohet” siguruesve – UBS: Priten humbje prej të paktën $25 mld për industrinë
Uragani Dorian do të shkaktojë dëme prej të paktën 25 miliardë dollarë për firmat e sigurimit, sipas analizës së bankës zvicerane UBS. Kjo shifër e kthen stuhinë në katastrofën natyrore më të shtrenjtë për industrinë që prej vitit 2017. Humbjet e sigurueseve nga Dorian mund të arrijnë deri në 40 miliardë dollarë, në varësi të goditjes së bregut të Floridas në ditët e ardhshme.
Deri më tani, Uragani Dorian është stuhia më e fuqishme e Atlantikut që prej vitit 1935, sipas Shërbimit Kombëtar të Motit. Katastrofa e fundit që shkaktoi dëme mbi 25 miliardë dollarë te siguruesit ishte Uragani Maria dy vite më parë, sipas kompanisë gjermane “Mynich Re”, që përpilon databazën për humbjet më të mëdha. Industria e sigurimeve ka përfituar nga stuhitë e pakta që prej uraganit Maria.
Sipas UBS, kjo ka bërë që kompanitë më të mëdha të risigurimeve në botë, që mbajnë pjesën më të madhe të rrezikut nga uraganet, të kenë një kapital shtesë prej 30 miliardë dollarë. Banka vlerësoi se humbjet e mundshme nga “Dorian”, mund ta konsumojnë këtë kapital, duke bërë që risiguruesit të ndryshojnë çmimet e tyre.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.