Doza nxitëse për 12-15 vjeçarët në SHBA – FDA autorizon vaksinën e Pfizer, si dhe shkurton intervalin në 5 muaj
Administrata e Barnave dhe Ushqimeve më Shtetet e Bashkuara, autorizoi përdorimin e një doze të tretë të vaksinës së Pfizer me BioNTech për fëmijët në moshë 12-15 vjeç, si dhe ngushtoi intervalin e marrjes së dozave nxitëse në 5 muaj nga 6. Agjencia autorizoi gjithashtu një dozë të tretë për fëmijët në moshë 5-11vjeç që kanë sistem imunitar të kompromentuar. Vendimi rregullator vjen në një kohë të rritjes së rasteve me variantin Omicron dhe përpara se fëmijët të rikthehen në shkolla pas pushimeve.
“Bazuar tek vlerësimet e Agjencisë ndaj të dhënave të disponueshme, një dozë nxitëse e vaksinave të autorizuara mund të ofrojë mbrojtje më të mirë kundër të dy varianteve, Delta dhe Omicron”- tha Peter Marks, drejtor i qendrës për vlerësime biologjike tek Administrata e Barnave në SHBA. Qeveria e SHBA i ka bërë thirrje amerikanëve që të vaksinohen dhe të marrin dozat nxitëse, duke i bërë të ditur dhe të pavaksinuarve që janë në rrezik më të lartë të Covid të ashpër dhe vdekjes. NJë panel këshillues i CDC pritet të takohet më vonë gjatë javës për të diskutuar mbi këto ndryshime. Infeksionet ditore me Covid janë dyfishuar në 418,000 , sipas mesatares së 7 ditëve të fundit.
Deri më tani 62% e popullsisë së përshtatur në SHBA konsiderohet tërësisht e vaksinuar, me 1/3 e tyre që ka marrë një dozë nxitëse. Agjencia bëri të ditur se e ka marrë vendimin pasi rishikoi të dhëna në terren nga izraeli, përfshirë sigurinë tek mbi 6,200 individë në moshë 12-15vjeç, që kishin marrë një dozë të tretë të Pfizer, të paktën 5 muaj pas përfundimit të regjimit me 2 doza. Sipas CDC, 2 doza të vaksinës me teknologji të mARN, janë rreth 35% efektive kundër infeksionit nga Omicron, por një dozë nxitëse rikthen efektshmërinë në 75%, bazuar tek të dhënat nga Afrika e Jugut dhe Mbretëria e Bashkuar.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.