Dozat e treta të vaksinës në SHBA – Fauci: Pfizer pritet të miratohet së shpejti. Moderna mbetet pas
Eksperti kryesor i sëmundjeve infektive në SHBA, Anthony Fauci, tha se autoritetet mund të marrin së shpejti pëlqimin rregullator për të administruar dozën nxitëse të Pfizer, ndërkohë që për vaksinën e Moderna, do të kërkojë më shumë kohë. Fauci tha se plani i presidentit Joe Biden për të dhënë dozat e treta nga 20 Shtatori nuk ka ndryshuar. Megjithatë, ndërsa Pfizer ka dorëzuar të dhënat e nevojshme për dozat nxitëse tek Adminsitrata e Barnave dhe Ushqimeve, Moderna nuk e ka përfunduar ende procesin.
Fauci tha se shpreson të ketë dy vaksina kur të nisë administrimi i dozave të treta, por nëse Moderna nuk përfundon procesin përpar 20 Shtatorit, atëherë do të nisë fushata vetëm me Pfizer. Nevoja e administrimit të dozave të treta qëndron një çështje e nxehtë, pasi Covid-19 vazhdon të shkaktojë viktima tek të pavaksinuarit në botë.
Muajin e kaluar, administrata e Biden lajmëroi se do të nisë ofrimin e dozave të tretë nxitëse tek amerikanët nga 20 Shtatori, duke marrë kompetenca të lajmërimit që zakonisht i takojnë Administratës së Barnave dhe Qendrës për Kontrollin e Sëmundjeve. Shkencëtarët po debatojnë ende mbi sasinë shtesë të imunitetit që ofrojnë dozat e treta dhe nëse të gjithë amerikanët kanë nevojë për ato.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.