Dozat nxitëse në Britani, “një sukses i madh” – Javid: Me rreth 400,000 doza në ditë, Dimri në vend do jetë ndryshe
Sekretari i Shëndetësisë në Britani, Sajid Javid, tha se thuajse 400,000 doza nxitëse të Covid-19 po administrohen çdo ditë në Mbretërinë e Bashkuar. Javid tha se programi i dozave nxitëse ka qenë një sukses i madh. “Deri më tani, 15 milionë doza nxitëse janë administruar në Mbretërinë e Bashkuar”- tha Javid. Prezantimi i dozave nxitëse ndaj Covid-19 në Britani, pritej të zgjerohej tek njerëzit nga 40-49 vjeç, sipas zyrtarëve, në përpjekje për të shtuar imunitetin e zbehur tek popullsia, përpara muajve të ftohtë të Dimrit.
“Ndërkohë që presim Krishtlindjet, është e trishtë të vëzhgojmë rritje të rasteve në pjesë të Europës. Ne e kemi ditur se këtij virusi, i pëlqen Dimri, i pëlqejnë ditët e ftohta dhe të errëta. Ajo që bën diferencën këtu në Britani është programi ynë i dozave nxitëse, tejet i suksesshëm, me thuaje 15 milionë të administruara deri më tani”, u shpreh Sajid Javid, Sekertari i Shëndetësisë në Britani.
Aktualisht, të gjithë personat në 50-vjeç e sipër, ato që janë të cënuar në mënyrë klinike dhe punonjësit e shëndetësisë, janë të përshtatshëm për dozat e treta nxitëse, dhe komisioni i përbashkët i Vaksinimit dhe Imunizimit (JCVI), ka thënë se programi do zgjerohet edhe për të tjerë. Këshilla vjen ndërkohë që Agjencia e Sigurisë Shëndetësore në vend, publikoi të dhëna në terren, ku zbuloi se doza nxitëse ofron 90% mbrojtje kundër sëmundjes simptomatike për njerëzit në moshë 50-vjeç e sipër.
Klevis Llaha /SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.