Dozë e katërt e vaksinës në Austri – Rekomandohet për personelin shëndetësor dhe zonat kritike sistematike

Austria duhet t’i ofrojë stafit të kujdesit shëndetësor dhe punonjësve të tjerë kryesorë një dozë të katërt përforcuese kundër COVID-19, deklaroi Bordi Kombëtar i Vaksinimit në udhëzimin e përditësuar, duke përmendur rreziqet nga varianti Omicron i koronavirusit që përhapet me shpejtësi.

Por, sipas Bordit, nuk ka të dhëna të mjaftueshme shkencore për të rekomanduar që doza e katërt të jepej masivisht. “Për të parandaluar një valë të afërt të përhapjes së Omicron, një vaksinim i katërt mund të ofrohet në shtresa me rrezik të lartë (p.sh. personeli i kujdesit shëndetësor i ekspozuar) dhe në zona kritike sistematike nga gjashtë muaj pas vaksinimit të tretë,” tha bordi.

Qeveria e Austrisë njoftoi se do të shtrëngojë përsëri masat kufizuese nga 27 dhjetori për të ngadalësuar përhapjen e variantit Omicron. Në nëntor, qeveria njoftoi një bllokim të katërt kombëtar dhe tha se do t’i bënte vaksinimet të detyrueshme për të gjithë austriakët, vendi i parë i Bashkimit Europian që e bën këtë.

Ndërsa ai bllokim trejavor uli infeksionet e përditshme COVID-19 nga nivelet rekord, vendi po përgatitet për një rritje tjetër. Disa qindra raste të Omicron janë konfirmuar tashmë.

Në udhëzimet e tij të përditësuara, Bordi Kombëtar i Vaksinimit tha se vaksinat e katërta COVID-19 mund t’u jepen grupeve në kujdesin shëndetësor dhe zonave të tjera kritike pas konsultimit mjekësor. “Nuk ka ende asnjë provë që ky vaksinim shtesë mund të parandalojë infeksionet. Megjithatë, mund të supozohet se sëmundjet e rënda mund të parandalohen”, nënvizoi Bordi.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.