DPT: Sot është afati i fundit për dorëzimin e deklaratës vjetore të Tatimit të Thjeshtuar
Përfundon sot afati për dorëzimin e deklaratës vjetore të Tatimit të Thjeshtuar mbi Fitimin për Biznesin e Vogël me qarkullim nga 0-5 dhe nga 5-8 milionë lekë. Kjo përshkon me periudhën tatimore të vitit kalendarik 2017.
“Në mbështetje të nenit 16 të ligjit nr.9632, datë 30.10.2006 “Për sistemin e taksave vendore”, i ndryshuar kjo deklaratë vjetore duhet të dorëzohet nga;
Çdo tatimpagues, subjekt i tatimit të thjeshtuar mbi fitimin e biznesit të vogël, me qarkullim nga 5 (pesë) deri në 8 (tetë) milionë lekë, ku të jepen hollësisht të ardhurat gjithsej, shpenzimet e zbritshme, fitimi i tatueshëm, tatimi për t’u paguar, si dhe çdo hollësi tjetër e përcaktuar me udhëzim të Ministrit të Financave për plotësimin dhe dorëzimin e deklaratës tatimore vjetore.
Të gjithë tatimpaguesit e tatimit të thjeshtuar mbi fitimin me qarkullim vjetor nga 0 (zero) deri në 5 (pesë) milionë lekë. Këta tatimpagues e plotësojnë këtë deklaratë sipas mënyrës së përcaktuar në udhëzimin e Ministrit të Financave.”
Drejtoria e Përgjithshme e Tatimeve duke sjellë në vëmendje 12 shkurtin 2018 si afatin e fundit për dorëzimin e kësaj deklarate, këshillon edhe plotësimin e saj në mënyrë korrekte.
Administrata tatimore fton të gjithë bizneset që t’i drejtohen sporteleve të Shërbimit ndaj Tatimpaguesve për çdo informacion apo asistencë që lidhet me dorëzimin e kësaj deklarate. Po ashtu, DPT ka vënë në dispozicion numrin pa pagesë të Qendrës së Thirrjeve 0800 00 02 ku ata mund të telefonojnë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.