DPT zbardh takimin e mbajtur në Lubjanë/ Vjero: BE dhe FMN, mbështetje të kombinuar për zhvillimin ekonomik
Drejtoresha e Përgjithshme e Tatimeve Vasilika Vjero dhe zëvendësministri i Financave Erjon Luçi, morën pjesë në takimin e dytë vjetor të Komisionit Europian dhe Fondit Monetar Ndërkombëtar (FMN), i cili u mbajt në Lubjanë më 31 Maj.
Ky takim fokusohej tek programi i zhvillimit të kapaciteteve, i financuar nga BE “Forcimi i Qeverisjes Ekonomike dhe Menaxhimit të Financave Publike” i cili është duke u zbatuar aktualisht nga FMN në Evropën Juglindore.
Ndërkohë sot Drejtoria e Përgjithshme e Tatimeve ka zbardhur edhe njoftimin pas takimit të zhvilluar, ku ishin pjesëmarrës përfaqësuesit dy prej institucioneve kryesore në vend.
Në fjalën e saj, drejtoresha e DPT, Vjero theksoi se asistenca teknike nga FMN ka ndihmuar në ndërtimin e strategjive më të mira në administratën tatimore në ofrimin e shërbimeve më të mira ndaj qytetarëve. Po kështu ajo shprehu vlerësimin për mbështetjen e kombinuar të BE dhe FMN ndaj zhvillimit ekonomik, mbështetje e cila ka nxitur përpjekjet për të përmbushur kriteret që çojnë në anëtarësimin në BE.
Z.Bernard Brunet, kreu i Njësisë përgjegjëse për Mbështetjen Tematike, Monitorimin dhe Vlerësimin në Komisionin Europian (Drejtoria e Përgjithshme për Negocimin e Fqinjësisë dhe Zgjerimit) theksoi se partnerët e Ballkanit Perëndimor kanë bërë progres thelbësor reformash gjatë vitit të kaluar, në linjë me synimin e BE për të promovuar qeverisjen e përmirësuar ekonomike në rajon.
Pjesëmarrësit u takuan me Ministra dhe zyrtarë nga Shqipëria, Bosnja dhe Hercegovina, Kosova, Ish Republika Jugosllave e Maqedonisë, Mali i Zi e Serbia dhe diskutuan progresin e arritur, planin e punës të propozuar për vitin në vazhdim si edhe prioritetet afat-mesme.
Mbështetja e politikave makroekonomike dhe institucioneve të financave publike në vendet anëtare dhe në vendet partnere ka qenë një objektiv i përbashkët si i FMN ashtu edhe i BE-së. Partneriteti i tyre është intensifikuar gjatë pesë viteve të fundit dhe përfshin konsultime të rregullta në nivel stafi dhe në nivele menaxheriale. Përpjekjet e FMN për zhvillimin e kapaciteteve janë pjesë e mandatit të saj thelbësor dhe ndihmojnë qeveritë të modernizojnë politikat dhe institucionet e tyre ekonomike.
Osman Dedja/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.