Draghi kritikon Washingtonin – “Nuk duhet përdorur komunikimi për të shënjestruar kursin e këmbimit”
Kreu i Bankës Qendrore Europiane, Mario Draghi, i’u kundërpërgjigj Washingtonit për komentet në lidhje me dollarin amerikan. Draghi shtoi se kjo lëvizje kërcënon paktin që ka zgjatur prej dekadash, ku nuk duhet shënjestruar valuta dhe mund të detyrojë bankën qendrore për të ndryshuar politikat.
Duke e quajtur rritjen e euros si një burim të pasigurisë, Draghi tha se lëvizjet e pajustifikuara mund të detyrojnë institucionin në Frankfurt që të rimendojë strategjinë, pasi një valutë e fortë mund minimizojë përpjekjet për të rritur inflacionin.
Presidenti i Bankës Qendrore Europiane foli pas sekretarit amerikan të Thesarit, Steven Mnuchin, i cili e mirëpriti dollarin e zhvlerësuar për shkak se mbështet tregtinë amerikane.
Draghi uli gjithashtu pritshmëritë për rritjen e normave të interesit, duke argumentuar se nuk ka thuajse asnjë shans për një ndërhyrje këtë vit, pavarësisht pritshmërive të investitorëve për një rritje në Dhjetor.
Megjithatë, komentet mbi valutën morën vëmendje më të madhe në konferencën për shtyp pas takimit të BQE.
“Kur dikush thotë se kursi i këmbimit është pozitiv për eksportuesit dhe për ekonominë, atëherë po shënjestron kursin e këmbimit. Dakordësia për mos ta bërë këtë, ka qenë ekzistuese prej dekadash”, tha Draghi në përgjigje të komenteve të Mnuchin.
Banka në Frankfurt është e ndjeshme ndaj lëvizjeve të euros, pasi një rritje e madhe mund të ndikojë inflacionin, duke përmbysur impaktin e stimujve që institucioni ka ofruar këto 3 vite.
Sipas Draghit, euro është rritur pjesërisht prej “përdorimit të dialogut mbi zhvillimet në kursin e këmbimit, që bie në kundërshti me kushtet e rëna dakord”.
Megjithatë, komentet e Draghit se fuqizimi i euros vjen pjesërisht edhe prej ekonomisë së fortë të rajonit, e çuan valutën e përbashkët në 1.2538 këtë javë, që është niveli më i lartë që prej Dhjetorit 2014.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.