Draghi me propozim të ri – Krijojmë një instrument të ri financiar për t`u mbrojtur
Eurozona ka nevojë për një instrument të ri dhe të përbashkët fiskal, në mënyrë që të mbajë të bashkuara vendet anëtare, edhe kur janë nën sulmin e tregjeve financiare, deklaroi numri një i Bankës Qendrore Europiane, Mario Draghi.
Muajin e ardhshëm, liderët e unionit do të takohen dhe do të diskutojnë pikërisht çështjet që mbajnë pezull reformimin e unionit.
Kështu, Draghi ka bërë një propozim të ri; atë të krijimit të një instrumenti të mbështetur nga qeveritë e unionit për të ndihmuar në rast emergjence vendet e dobëta nëse penalizohen nga tregjet në periudhë krizash.
“Na duhet diçka e tillë për të ruajtur konvergjencën në rast krizash të mëdha, pa pasur nevojën të mbingarkojmë politikat monetare”, nënvizoi Mario Draghi.
Kreu i Bankës Qendrore Europiane nuk dha shumë detaje dhe shtoi se, një instrument i tillë financiar është shumë i vështirë për tu konceptuar dhe dizenjuar.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.