Drejt finalizimit tenderi për gjeneruesin termik – KESH: Në garë janë 2 kompani të huaja, diversifikim i burimeve të prodhimit të energjisë
2 kompani të huaja janë në garë për procedurën e hapur nga Korporata Elektroenergjetike Shqiptare, që synon të marrë me qira një aset gjenerues termik të energjisë, që do të rrisë dhe diversifikojë kapacitetet gjeneruese për kompaninë publike të prodhimit. Burime zyrtare nga ky dikaster thanë për TV SCAN se kompanitë janë të huaja, ndërkohë që brenda datës 10 shkurt pritet të shpallet edhe fituesi.
Referuar procedurës, KESH synon të marrë me qira për një periudhë 2-vjeçare asetin gjenerues termik të energjisë, me kapacitet 110 – 130 MW. Procedura për përzgjedhjen e kompanisë u shpall menjëherë pas vendimit të qeverisë, të muajit dhjetor të vitit që sapo lamë pas, që lejonte kompaninë publike t’i drejtohej tregut ndërkombëtar për të marrë përkohësisht me qera asete gjeneruese termike shtesë, të cilat mund të instalohen dhe lidhen lehtësisht me Rrjetin e Transmetimit të Energjisë në Shqipëri.
Ndërkaq, do të jetë oferta fituese që do të përcaktojë sesa do t’i kushtojë Korporatës kjo kontratë, por synimi është që çmimi të jetë më i ulët nga ai me të cilin sigurohet energjia nga importi . Sipas termave të referencës impianti termik do të përdorë karburant të lëngshëm, si gasoil ashtu edhe mazut/solar për të gjeneruar energjinë , ndërsa duhet të jetë i disponueshëm për t’u instaluar pranë TEC Vlora, për të shfrytëzuar infrastrukturën nderlidhëse me rrjetin e transmetimit të TEC –it. Gjithashtu, kërkohet që impianti të jetë i lundrueshëm, teksa vendi i pozicionimit parashikohet të jetë baseni i Triportit.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.