Drejt rihapjes gara ndërkombëtare për Aeroportin e Vlorës! Ishte pezulluar në mars
Gara ndërkombëtare për Aeroportin e ri të Vlorës pritet të zhbllokohet javën e ardhshme. Lajmi u bë i ditur nga kryeministri Edi Rama në ceremoninë e hapjes së garës ndërkombëtare për ndërtimin e parkut fotovoltaik të Karavastasë. Në fjalën e tij, kryeministri tha se javën e ardhshme do të zhbllokohet procesi për të cilin janë bërë përpjekje dhe që e konsideroi si një ‘gur të rëndësishëm në mozaikun e përgjithshëm të Shqipërisë’.
Situata e krijuar nga përhapja e koronavirusit të ri, duket se ka ndikuar edhe në garën ndërkombëtare për ndërtimin e aeroportit të Vlorës. Pas 2 shtyrjeve të mëparshme, në mars të këtij viti gara u pezullua, ndërkohë që nuk dihej se kur do të rihapej për kompanitë e interesuara.
Aeroporti i Vlorës është një prej projekteve më të rëndësishme infrastrukturore, përmes të cilit qeveria synon të ndikojë në uljen e çmimit të biletave.
Ndërtimi parashikohet të kryhet përmes një partneritetit publik-privat, ku fillimisht kompania fituese do të duhet të kryejë investimin , ndërsa do të ketë të drejtën e operimit për një periudhë 35-vjeçare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.