Drejtësia, çfarë e zvarriti reformën – Analiza e Ministrisë: Nuk ju përmbajtëm dot planveprimit që me KLP e KLGJ
Një zinxhir vonesash kanë bërë që Ministria e Drejtësisë të mos i përmbahet dot plan-veprimit fillestar të reformimit të gjyqësorit e organeve hetimore për hapësirën kohore 2019-2021. Në një analizë pune të kryer për gjashtë muajt e parë të këtij viti Ministria evidenton vonesa të theksuara të thuajse të të gjitha organeve të reja të drejtësisë, duke nisur nga Këshillat e Gjyqësorit e të Prokurorisë.
“Moskrijimi në kohë i institucioneve të reja të sistemit të drejtësisë si: Inspektori i Lartë i Drejtësisë, SPAK dhe Gjykata kundër Korrupsionit dhe Krimit të Organizuar. Për më tepër, krijimi me vonesë i Këshillit të Lartë Gjyqësor dhe Këshillit të Lartë të Prokurorisë, gjatë muajit dhjetor 2018 dhe Këshillit të Emërimeve në Drejtësi, në muajin janar 2019, kanë ndikuar në realizimin jo të lartë të masave të Planit të Veprimit.
Me hyrjen në fuqi të Planit të ri të Veprimit 2019 – 2021 (të miratuar me VKM Nr. 409, dt. 19.06.2019), institucionet përgjegjëse kanë pasur një kohë relativisht të shkurtër për marrjen e masave të nevojshme për zbatimin e aktiviteteve të parashikuara në Plan veprim’, theksohet në analizën e disponuar nga Scan.
Ndërkohë që, po sipas Ministrisë, mbetet problematike përgjegjshmëria e institucioneve për të raportuar në kohë dhe me cilësi lidhur me informacionin mbi masat e Planit të Veprimit. “Nevojitet një bashkëpunim më i lartë i Dhomave, për të kontribuar dhe raportuar lidhur me implementimin e Planit të Veprimit 2019 – 2021, në zbatim të Strategjisë Ndër-sektoriale të Drejtësisë”, thekson analiza e Ministrisë së Drejtësisë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.