Drejtori i ALSE, Artan Gjergji në “Përtëfol”: Detajet, ja se si do të funksionojë Bursa Shqiptare e Titujve  

Më në fund edhe Shqipëria duke nisur nga vjeshta e këtij viti, do të ketë funksionale bursën e parë me kapital privat. ALSE, Bursa Shqiptare e Titujve, e licencuar tashmë nga AMF, konsiderohet si zhvillimi me i rëndësishëm financiar në dekadat e fundit. ALSE, krijon një mundësi më shumë për të investuar, ne një treg të rregulluar, që ofron besim dhe transparencë të plotë, për bizneset, korporatat dhe individët. Drejtori i Bursës Shqiptare të Titujve, Artan Gjergji në një intervistë në emisionin “Përtëfol” në TV SCAN, thekson rëndësinë e krijimit të tregut të kapitaleve në vend si dhe jep detaje, se si do të funksionojë bursa.

“Si fillim, Shqipëria është shumë e vonuar, në krijimin e një tregu kapitalesh. Edhe shtete që prej dekadash janë në luftë, kanë një treg të zhvilluar kapitalesh. Por më së fundmi edhe Shqipëria do të ketë bursën funksionale. Aktualisht jemi në fazën e një bashkëpunimi të shkëlqyer me Bankën e Shqipërisë, për të harmonizuar dy sistemet dhe synojmë që në vjeshtë “t’i biem gongut”, pra të fillojmë tregtimin e titujve në bursë. Në fillim do të tregtohen titujt qeveritarë, pasi aktualisht në Shqipëri është funksional vetëm institucioni hipotekues i titujve të qeverisë.

Ndërsa për titujt e tjerë si; aksionet, obligacionet e korporatave, letrat tregtare që emeton biznesi, apo obligacionet bashkiake, nuk janë ende të regjistruara në një depozitar titujsh. Në AMF, është në pritje të licencimit, një institucion, që do të bëjë regjistrimin e tyre dhe në këtë mënyrë, do të përmbushet i gjithë kuadri i funksionimit të tregut të kapitaleve. Nëse biznesi para 10 vitesh, ishte me bazë familjare, sot kompanitë janë hapur kundrejt aksionarëve të tjerë. Lidhur me tregun e kapitaleve, një proces shumë i rëndësishëm mbetet edhe edukimi i publikut. Edukimi, duhet të nisë që në shkollën fillore. Ne kemi shumë rrugë për të bërë në këtë drejtim” shprehet Gjergji.

Dafina Hysa/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.