Drejtori i AMF-së, Ervin Mete takim me drejtuesen e misionit të FMN-së: “Tregu i sigurimeve më i ekspozuari nga efektet e COVID-19”
Drejtori i Përgjithshëm Ekzekutiv i Amfës, z.Ervin Mete ka zhvilluar një takim me Drejtuesen e re të misionit të FMN-së, Znj.Yan Sun.
Mete në bashkëbisedimin e zhvilluar me drejtuesen e FMN-së ka shpjeguar lëvizjet më të fundit në tregjet financiare, ku ka theksuar faktin se tregu i sigurimeve rezultoi edhe ndër më të ekspozuarit nga efektet e COVID-19.
Gjithashtu në takim është folur edhe për miratimin e tre ligjeve të reja në Kuvendin e Shqipërisë që pritet të modernizojnë tregjet financiare dhe të nxisin zhvillimin ekonomik.
Ndërkohë në takimin e zhvilluar Z.Mete përcaktoi dixhitalizimin si sfidë kryesore të AMF-së në të ardhmen:
Njoftimi i plotë:
Drejtori i Përgjithshëm Ekzekutiv i Autoritetit të Mbikëqyrjes Financiare, Z. Ervin Mete, zhvilloi një takim me Drejtuesen e re të misionit të Fondit Monetar Ndërkombëtar për Shqipërinë, Znj. Yan Sun, përmes platformës virtuale të komunikimit Webex.
Në takim u diskutua në lidhje me zhvillimet më të fundit në tregjet nën mbikëqyrjen e Autoritetit dhe impaktin e pandemisë COVID-19. Z. Mete u shpreh se tregu i sigurimeve rezultoi më i ekspozuari nga efektet e koronavirusit, edhe pse pritet që rihapja të sjellë normalizimin e treguesve financiarë për shoqëritë e sigurimit.
Drejtori i Përgjithshëm Ekzekutiv i AMF-së theksoi se miratimi së fundmi i tre ligjeve të reja nga Kuvendi i Shqipërisë, “Për sipërmarrjet e investimeve kolektive”, “Për tregjet e kapitalit” dhe “Për tregjet financiare bazuar në teknologjinë e regjistrave të shpërndarë” pritet të modernizojë funksionimin e këtyre tregjeve dhe të kontribuojë në zhvillimin ekonomik të vendit.
Z. Mete e cilësoi dixhitalizimin si një sfidë kryesore të Autoritetit në kushtet e reja të krijuara si pasojë e COVID-19, për të siguruar raportimin në kohë reale të të dhënave për të gjitha subjektet nën mbikëqyrje, por edhe në funksion të komunikimit ndërinstitucional dhe lehtësimit të procedurave për qytetarët.
Drejtuesja e misionit të Fondit Monetar Ndërkombëtar, Znj. Yan Sun vlerësoi rolin e AMF në mbikëqyrjen e tregjeve financiare jobankare, si edhe shprehu gadishmërinë për të vijuar asistencën për Autoritetin, përmes ekspertizës, edhe në kuadër të ligjeve të reja të miratuara së fundmi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.