Drejtori i AMF takim me shoqëritë e sigurimit: “Të vazhdohet me pagesat e tërmetit. Duhen marrë masa për zhvillimin e tregut”
Drejtori i Përgjithshëm Ekzekutiv i Autoritetit të Mbikëqyrjes Financiare, Z. Ervin Mete, ka zhvilluar në ditën e stome një takim me drejtuesit e shoqërive të sigurimit.
Institucioni edhe në vërejtjet e mëparshme ka konstatuar se tregu i sigurimeve është ndër më të goditurit nga kriza e COVID-19 për shkak të specifikave që ka. Fokusi në takimin e sotëm ishte i përqendruar në marrjen e hapave të ardhshëm për të përmirësuar funksionimin dhe ecurinë e tij, sipas njoftimit.
Z.Mete ka bërë kërkesë ndaj shoqërive që dëmshpërblimi për dy tërmetet e kaluara të procedohet në mënyrë sa më të shpejtë për plotësimin e të gjitha pagesave të prapambetura tek përfituesit.
Shoqëritë e sigurimeve gjithashtu duhet të marrin masa për rishikimin e planeve të vazhdimësisë së biznesit në rastet e krizave dhe situatave të jashtëzakonshme është shprehur z.Mete.
Përtej shumë sfidave shëndetësore dhe ekonomike, që COVID-19 nxorri në pah, një tjetër element për tu mos u nënvlerësuar ishte edhe varësia ndaj sigurimit TPL, që rrjedhimisht kërkon edhe zhvillimin e tregut të sigurimeve, theksoi drejtori i AMF-së në takim, ndërsa për këtë nevojiten masa të posaçme.
“Drejtori i Përgjithshëm Ekzekutiv u kërkoi drejtuesve të shoqërive të sigurimit marrjen e masave për të parashikuar në kontratat e sigurimit specifikime lidhur me situatat e krizave, në funksion të transparencës ndaj personave të siguruar.
Në takim u diskutua edhe në lidhje me çështje të tjera në funksion të zhvillimit dhe mirërregullimit të tregut, përmirësimit të raportit dëme/prime, etj.” – thuhet më tej në njoftim.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.