Drejtori i “Sberbank” përgënjeshtron Putin: Rusisë do t’i duhen 10 vjet për të rimarrë veten nga sanksionet perëndimore!

Sberbank është banka kryesore ruse, dhe ka një rëndësi të vecantë për Kremlinin. Kreu i bankës, Herman Gref, paralajmëroi se do të duhen 10 vjet para se ekonomia e Moskës të rikthehet në nivelet para hyrjes në fuqi të sanksioneve perëndimore ndaj vendit. Një përgënjeshtrim i drejtpërdrejtë i asaj që tha Vladimir Putin, i cili shprehet se “embargo” aktualisht ka pasoja shumë të kufizuara në ekonominë e vendit. Gref e bëri deklaratën e tij pikërisht nga e njëjta tribunë ku presidenti rus sulmoi ashpër Europën dhe Shtetet e Bashkuara të Amerikës.

CEO i Sberbank – i cituar nga agjencia e lajmeve Reuters – qartësoi se vendet që kanë vendosur sanksione ndaj Rusisë përfaqësojnë 56% të eksporteve të vendit dhe 51% të importeve. Sipas tij pjesa më e madhe e ekonomisë ruse është në shënjestër. Për pasojë, nëse nuk veprohet për të ndryshuar situatën, do të duhej një 10 vjecar që ekonomia e vendit të rikthehej në nivelet e vitit 2021. Gref kërkoi një reformë strukturore të ekonomisë ruse. Të njëjta koncepte që në 18 prill të këtij viti shfaqi dhe Elvira Nabiullina, në krye të bankës qendrore ruse, sipas të cilës sanksionet po godasin ashpër sipërmarrjet dhe familjet ruse.

Sipas Gref, dërgesat e mallrave janë pakësuar me gjashtë herë ndërsa dhe transporti detar dhe ai ajror është bllokuar pasi sanksionet i ndalojnë kompanive ajrore ruse që të fluturojnë drejt perëndimit, dhe anijeve ruse i ndalohet hyrja në portet e Bashkimit Europian. Sanksionet ndaj bankave ruse kanë frenuar një pjesë të madhe të transaksioneve financiare me palë të huaja, ndërsa Rusisë i është ndaluar të marrë aparatura dhe pjesë të rëndësishme për industritë e saj të automjeteve, energjitike dhe ajrore.

Sberbank në vitin 2020 faturoi më shumë se 47 miliard dollarë. Por duke qenë një subjekt i madh financiar nuk u kursye nga sanksionet perëndimore dhe në muajin mars është lënë jashtë sistemit të shkëmbimeve ndërkombëtare, Suift. Praktikisht kompanitë ruse nuk mund të mbështeten më tek Sberbank për transaksionet e tyre ndërkombëtare. Pesha financiare e grupit i bën dhe më domethënëse  fjalët e numrit një të saj, të thëna për më shumë në prani të presidentit rus Putin.

Por fjalët e Gref konfirmohen dhe nga parashikimet e bëra pak ditë më para nga Banka Botërore në raportin për “Perspektivat e ekonomisë globale. Raport në të cilin bëhen të qarta parashikimet për zhvillimin e cdo vendi apo zone ekonomike të planetit. Banka Botërore parashikon një rritje prej 2.6% për Shtetet e Bashkuara të Amerikës deri në fund të këtij viti; 2.5 për zonën euro dhe Japoninë si dhe një rënie prej 8.6 të prodhimit të brendshëm bruto për Rusinë. Ky është dhe parashikimi më i ulët në të gjithë ekonominë botërore.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.