Drejtoria e Tatimeve zhvillon takime informuese në kuadër të ligjit të ri për Shkëmbimin Automatik të Informacionit
Drejtoria e Përgjithshme e Tatimeve ka organizuar në ditën e sotme një takim të zgjeruar me të gjithë palët e interesuara rreth shpjegimit të teknikaliteteve për ligjin që u miratua në parlament mbi “Për Shkëmbimin Automatik të Informacionit të Llogarive Financiare”.
Ky ligj do të ndikojë mbi të gjitha Institucionet Financiare, Shoqëritë e kursim-kreditit, Entet investuese dhe shoqëritë e sigurimit.
Informacioni për t’u shkëmbyer përfshin balancat e llogarive financiare në fund të vitit që raportohet, fitimet kapitale (përfshirë interesat, dividendët, të drejtat dhe të ardhurat nga shitja e aseteve financiare), të raportuara te qeveritë nga institucionet financiare, duke mbuluar llogaritë e mbajtura nga individët dhe entitetet përfshirë trustet dhe fondacionet.
Ky proces sipas DPT-së kërkon ndjekjen e rregullave në mbledhjen, raportimin dhe ruajtjen e të dhënave nga ana e institucioneve financiare, kapacitete IT që të bëjnë të mundur shkëmbimin e informacionit si dhe marrjen e masave për të siguruar nivel të lartë të konfidencialitetit dhe sigurisë së të dhënave të shkëmbyera.
Informacioni i mbledhur do të jetë nën përgjegjësinë e DPT-së dhe brenda marrëveshjes së ratifikuar mund të bëjë transmetimin e tyre me vendet pjesëmarrëse në këtë kuadër ligjor.
Drejtoria e Tatimeve njofton se takimet do të vijojnë me grupet e interesit për t’i bërë të njohur ata mbi të gjitha teknikalitetet që duhet të ndiqen.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.