Drejtuesit e 23 vendeve, përfshirë Shqipërinë, mbështesin idenë e ‘Traktatit pandemik’ për emergjencat e ardhshme
Udhëheqësit e 23 vendeve dhe Organizata Botërore e Shëndetësisë mbështetën të martën një ide për të krijuar një traktat ndërkombëtar që do të ndihmonte botën të merrej me emergjencat e ardhshme shëndetësore si pandemia e koronavirusit që po shkatërron tani globin.
Ideja e një traktati të tillë, i cili do të siguronte qasje universale dhe të barabartë në vaksinat, ilaçet dhe diagnostikimet për pandemitë, u paraqit nga kryetari i udhëheqësve të Bashkimit Europian Charles Michel në një samit të G20 nëntorin e kaluar.
Të martën ajo mori mbështetjen zyrtare të udhëheqësve të 23 shteteve si Fixhi, Portugalia, Rumania, Britania, Ruanda, Kenia, Franca, Gjermania, Greqia, Korea, Kili, Kosta Rika, Shqipëria, Afrika e Jugut, Trinidad dhe Tobago, Holanda, Tunizia, Senegal, Spanjë, Norvegji, Serbi, Indonezi, Ukrainë dhe OBSH.
Qëllimi kryesor i një traktati të tillë do të ishte forcimi i rezistencës së botës ndaj pandemive të ardhshme përmes sistemeve më të mira të alarmit, ndarjes së të dhënave, hulumtimeve dhe prodhimit dhe shpërndarjes së vaksinave, ilaçeve, diagnostikimeve dhe pajisjeve mbrojtëse personale, thanë ata.
Traktati do të thoshte gjithashtu se shëndeti i njerëzve, kafshëve dhe planetit janë të gjithë të lidhur dhe duhet të çojnë në përgjegjësi të përbashkët, transparencë dhe bashkëpunim global. (Reuters)
E . S / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.